ސަރުކާރުން ތައާރަފްކުރަން ނިންމާފައިވާ ޓެކްސީ ފްލީޓްއާއެކު ޓެކްސީ ދާއިރާގައި އުޅޭ 10،000 އަށްވުރެ ގިނަ މީހުންނަށް އަސަރުކުރާނެ ކަމަށް އަވަސް ޓެކްސީ ހިދުމަތް ދޭ އަވަސް ރައިޑްއިން ބުނެފި އެވެ.
މާލެ ސަރަހައްދުގައި އިލެކްޓްރޯނިކް ޓެކްސީ (އީވީ) ގެ ހިދުމަތް ދޭން އެމްޓީސީސީ އާ ސަރުކާރުން ހަވާލުކުރީ މިދިޔަ ބުދަ ދުވަހުގަ އެވެ. އެއާ އެކު ޓެކްސީ ޑްރައިވަރުން ދަނީ އެކަމަށް ވަރަށް ބޮޑަށް ފާޑުކިއުން އެ ނިންމުން އަނބުރާ ގެންދަން ސަރުކާރަށް ގޮވާލަމުންނެވެ.
އެކަމާ ގުޅޭ ގޮތުން އަވަސް ރައިޑްއިން މިއަދު ނެރުނު ބަޔާނުގައި ބުނީ ޓެކްސީ ފްލީޓެއް ތައާރަފްކުރުމަކީ ޓެކްސީ ދުއްވާ ފަރާތްތަކާއި ޓެކްސީ ސެންޓަރުތައް ހިންގާ ފަރާތްތަކުގެ އިތުރުން ކުއްޔަށް ކާރު ދުއްވާ ފަރާތްތަކުގެ ދިރިއުޅުމަށް ނޭދެވޭ އަސަރުކުރާނެ ކަމެއް ކަމަށެވެ.
"ކުދި ވިޔަފާރިތަކަށް ގެއްލުންވެ މި ދާއިރާގެ ހަމަހަމަކަން ނެތިގެންދާނެކަން ކަށަވަރެވެ. މި ނިންމުމުގެ ސަބަބުން މި ދާއިރާގައި ރަޖިސްޓްރީވެ އާމްދަނީ ލިބެމުންގެންދާ 10،000އަށް ވުރެ ގިނަ ފަރާތްތަކަށް ސީދާ ނޭދެވޭ އަސަރުކޮށް އެ ފަރާތްތަކުގެ ހައްގުތަކަށް އަރައިގަނެވޭނެކަން ފާހަގަކުރަމެވެ،" އަވަސް ރައިޑްގެ ބަޔާނުގައި ބުނެފައިވެ އެވެ.
އަވަސް ރައިޑުން އިތުރަށް ބުނެފައިވަނީ ޑްރައިވަރުންގެ ފަރާތުން ފެންނަ ނޭދެވޭ އަމަލުތައް ހުއްޓުވަން އެކަށީގެންވާ ފިޔަވަޅު އަޅާފައި ނުވާ ކަމަށެވެ. އަދި ބައެއް ހާލަތްތަކުގައި ޑްރައިވަރުން ދަތުރުނުކުރާތީ ޝަކުވާ ލިބުނު ނަމަވެސް އެކަމުގެ އަސްލު ސަބަބު ދެނެގަންނަން މަސައްކަތްކޮށްފައި ނުވާ ކަމަށާއި، ޓެކްސީ ހިދުމަތުގައި އުޅޭ އެންމެނަށް އުނިކަން އަންނާނެ ގޮތަށް ނިންމުން ނިންމި ސަބަބު ސަރުކާރުން ސާފުކޮށްދޭން ޖެހޭ ކަމަށެވެ. މީގެ އިތުރުން، ޓެކްސީ ޑްރައިވަރުންގެ ހައްގުތައް ރައްކާތެރިކުރުމަށް ގާނޫނީ ގޮތުން އަޅަންޖެހޭ ފިޔަވަޅުތައް އަޅާނެ ކަމަށްވެސް އަވަސް ރައިޑުން ބުނެފައިވެއެވެ.
