އެމެރިކާގެ މިހާރުގެސަރުކާރުން، ސައުދީ އަރަބިއާއަށް، 3000 ސްމާޓް ބޮން (ޕްރެސިޝަން ގައިޑެޑް މިއުނިޝަން) ވިއްކުމަށް ސްޓޭޓް ޑިޕާޓްމަންޓުން ހުއްދަ ދޫކޮށްފައިވާ ކަމަށް، އެގައުމުގެ ދިފާޢީ ވުޒާރާ، ޕެންޓަގަން އިން ބުނެފިއެވެ.
މިއީ، 290 މިލިއަން އެމެރިކާ ޑޮލަރުގެ އަގުހުރި ޑީލެއް ކަމަށްވެސް ސްޓޭޓް ދިޕާޓްމަންޓުން ހާމަކޮށްފައި ވެއެވެ.
މި ޕެކޭޖުގައި ހިމެނެނީ، ކުދި ބޮންތަކެއްގެ ގޮތުގައި ފާހަގަ ކުރެވޭ (3,000 GBU-39 Small Diameter Bomb I (SDB I) munitions) ހަތިޔާރާއި، ކޮންޓޭއިނަރުތަކާއި، ސަޕޯޓު އާލާތްތަކާ، މަރާމާތު ކުރުމަށް ބޭނުންވާ ސްޕެއަރ ތަކުގެ އިތުރުން ފަންނީ އެހީތެރިކަން ކަމުގައިވެސް އެމެރިކާގެ ސްޓޭޓް ޑިޕާޓްމަންޓުން ހާމަ ކޮށްފައި ވެއެވެ.
GBU-39/B Small Diameter Bomb I މަރުކާގެ ބޮން ތައްޔާރު ކުރަން ފަށާފައިވަނީ، އެމެރިކާގެ ބޮއިން ކުންފުނީގެ ފަރާތުން މީގެ 10 ވަރަކަށް އަހަރު ކުރިންނެވެ. ބޮއިން ކުންފުނިން ބުނެފއިވާ ގޮތުގައި، ސައިޒުން ކުޑަ، އެހެންނަމަވެސް، ސީދާ އަމާޒަށް ހަމަލާ ދިނުމުގެ ގާބިލްކަން ލިބިފައިވާ މި ހަތިޔާރަކީ، ފައިޓަރ ޖެޓްތަކުން ދޭ ހަމަލާތައް ސިދާ އަމާޒަށް ވާސިލްކޮށް، ކޮންމެ އުދުހުމެއްގައިވެސް ގިނަ ޓާރގެޓްތަކަށް، ވަށައިގެންވާ ސަރަހައްދުތަކަށް ވީހާވެސް ކުޑަ ގެއްލުމަކާއެކީ ހަމަލާ ދިނުމަށް ތައްޔާރު ކުރެވިފައިވާ ހަތިޔާރެއް ކަމަށެވެ.
"މި ހަރިޔާރުތައް ގަތުމުގެ ނަތީޖާއެއްގެ ގޮތުން، ސައުދީ އަރަބިއާއަށް މިހާރުވެސް އަދި، މުސްތަގުބަލަށްވެސް ފެންނާން ހުރި ނުރައްކާރައް ކުޑަކޮށް، ވައިގެ މަގުން ދުރަށް ހަމަލާ ދިނުމުގެ ގާބިލްކަން އިތުރު ކޮށްދޭނެ. SDB I ގެ ސައިޒާއި އަދި ސީދާ އަމާޒަށް ހަމަލާ ދިނުމުގައި ލިބިފައިވާ ކާބިލްކަމުގެ ސަބަބުން، މިފަދަ ހަމަލާތަކުގެ ސަބަބުން ލިބޭ އެހެނިހެން ގެއްލުންތައް ކުޑަ ކުރެވިގެންދާނެ. އަދި، މިކުރެވޭ ވިޔާފާރީގެ ސަބަބުން އަސްކަރީ ހަތިޔާރުތައް ބޭނުން ކުރުމުގައި ދެގައުމުގެ ދެމެދުގައި އޮންނަ ދެނެގަތުން އިތުރަށް ހަރުދަނާ ކުރެވިގެން ދާނެ،" އެމެރިކާގެ، ގައުމުން ބޭރަށް ވިއްކާ އަސްކަރީ ހަތިޔާރުތަކާ ބެހޭ ޕްރޮގްރާމް ބަލައްޓާ އޭޖެންސީ ކަމުގައިވާ، ޑިފެންސް ސެކިއުރިޓީ ކޯޕަރޭޝަން އޭޖެންސީ (DSCA)އިން ބުނެފއި ވެއެވެ.
ޑިއެސްއޭއިން މިހަފްތާގެ އަންގާރަ ދުވަހު ވަނީ، ސައުދީއާއެކު ކުރެވޭ މިވިޔަފާރިއާ ގުޅޭ ސެޓިފިކޭޝަން އެމެރިކާގެ ކޮންގްރެސްއަށް ހުށަހަޅާފައެވެ.
ސްޓޭޓް ޑިޕާޓްމަންޓުން، ހަތިޔާރުގެ މި ވިޔަފާރި ސައުދީއާއެކު ކުރުމަށް ހުއްދަ ދީފައިވި ނަމަވެސް، ޑީއެސްއޭއިން ކޮންގްރެސްއަށް ހުށަހެޅި ނޯޓިފިކޭޝަންގައި، މި ހަތިޔާރުގެ ވިޔަފާރިއާ ބެހޭ އެއްބަސްވުމުގައި ސޮއިކޮށްފައިވާކަން ނުވަތަ ނޫންކަން ހާކަ ކޮށްފައެއް ނުވެއެވެ.
ޕެންޓަގަނުން އަންގާރަ ދުވަހު ވަނީ، އެޕާޗޭ ހެލިކޮޕްޓަރތަކާއި، އަދި ޕެޓްރިއޮޓިކް މިސައިލް ސިސްޓަމަށް ބޭނުންވާ ސްޕެއަރތައް ހިމެނޭ ގޮތުން، 4.2 ބިލިއަން ޑޮލަރުގެ ހަތިޔާރު ކުވައިތަށް ވިއްކުމަށް ސްޓޭޓް ޑިޕާޓްމަންޓުން އެއްބަސްވެފައިވާ ކަންވެސް ހާމަކޮށްފައެވެ.
