ދިރާގުން އިޢުލާން ކުރި "ވިން އަ ސްޕީޑް ބޯޓް" ޕްރޮމޯޝަންގެ ނަސީބުވެރިޔާ އިއްޔެ ހުޅުމާލޭ ސެންޓްރަލް ޕާކުގައި ބޭއްވުނު ޚާއްސަ އިވެންޓެއްގައި ހޮވައިފިއެވެ. މި ޕްރޮމޯޝަންގެ ނަސީބުވެރިއަކަށް ހޮވުނީ ހުސައިން ފަޔާޒެވެ.
ކުންފުނީގެ އަހަރީ ދުވަހާ ގުޅުވައިގެން ދިރާގުގެ ކަސްޓަމަރުންނަށް ޓެކްނޮލޮޖީގެ އެހީގައި ތަފާތު، އައު ތަޖުރިބާއެއް ފޯރުކޮށްދިނުމުގެ މަޤްޞަދުގައި މިދިޔަ އަހަރު ސެޕްޓެމްބަރު މަހު މި ޕްރޮމޯޝަން ތަޢާރަފުކުރިއެވެ. މީގެ ކުރިން ކުރިއަށްގެންދިޔަ "ވިން އަ ޓެސްލާ" ޕްރޮމޯޝަންގެ ކާމިޔާބީއާ ގުޅިގެން، މިފަހަރު ދިރާގުން ކަސްޓަމަރުންނަށް ހުޅުވާލީ އަލް ޝާލީ މެރިން މަޖެލަން 32ގެ ބޯޓެއް، ޔަމަހާ އައުޓްބޯޑް އިންޖީނާއެކު ކާމިޔާބުކުރުމުގެ ފުރުޞަތެވެ.
ޕްރޮމޯޝަންގައި ބައިވެރިވުމުގެ ފުރުޞަތު ހުޅުވާލާފައިވަނީ ދިރާގުގެ ޕްރިޕެއިޑް، ޕޯސްޓްޕެއިޑް އަދި ފައިބަރ ބްރޯޑްބޭންޑް ކަސްޓަމަރުންނަށެވެ. އެގޮތުން ޕްރިޕެއިޑް ޕްލޭންތަކަށް 400 ރުފިޔާ ނުވަތަ އެއަށްވުރެ މަތިން ރީޗާޖުކުރާ ކަސްޓަމަރުންނާއި، ޕޯސްޓްޕެއިޑް 400 އަދި ލިމިޓެއްނެތް ފައިބަރ 40 އެމްބީޕީއެސްއަށްވުރެ މަތީގެ ޕްލޭންތަކަށް ސަބްސްކްރައިބްކުރާ ފަރާތްތަކަށް ބައިވެރިވެވޭގޮތަށް ހަމަޖައްސާފައިވެއެވެ. ކޮންމެ ކަސްޓަމަރަކަށްވެސް ޝަރުޠު ހަމަވާ ހުރިހާ ނަންބަރެއް ޕޯޓަލް މެދުވެރިކޮށް އެންރޯލް ކުރެވެއެވެ.
ރާއްޖޭގައި ބޯޓު އުފެއްދުންތެރިކަމުގެ އެންމެ އިސް ސަފުގައި ހަރަކާތްތެރިވާ އަލް ޝާލީ މެރިން މޯލްޑިވްސްއިން ފަރުމާކޮށްފައިވާ މި މަޖެލަން 32 ސްޕީޑް ބޯޓާއެކު ނަސީބުވެރި ފަރާތަށް 175 ހޯސްޕަވަރުގެ ދެ ޔަމަހާ އައުޓްބޯޑް އިންޖީނުވެސް ލިބިގެންދާނެއެވެ. ނަސީބުވެރި ފަރާތް ހޮވުމަށް ބޭއްވި އިވެންޓުގައި އެކުއެޓިކް ވައިބްސްގެ ކުޅިވަރު ހުށަހެޅުންތައްވެސް ދައްކާލާފައިވެއެވެ. އަދި ޕްރޮމޯޝަންގެ ކަންކަން އިންސާފުވެރިކޮށް އަދި ދެފުށް ފެންނަ ގޮތެއްގައި ކުރިއަށް ގެންދިޔުމަށްޓަކައި މިނިވަން އޮޑިޓަރެއް ކަމުގައިވާ ނެކްސިޔާއާ ގުޅިގެން މަސައްކަތްކޮށްފައިވާ ކަމަށް ދިރާގުން ބުނެފައިވެއެވެ.
