ރައީސުލްޖުމްހޫރިއްޔާ ޑރ. މުޙައްމަދު މުއިއްޒު އުތުރުގެ ރަށްތަކަށް ކުރައްވަމުންދާ ރަސްމީ ދަތުރުފުޅުގައި، ސަރުކާރުގެ ބޮޑު ވަފުދަކާއެކު ރަށްރަށަށް ކުރައްވަމުންދާ ދަތުރުފުޅުތަކުގެ މަޤްޞަދު މިއަދު ތަފްޞީލުކޮށް ބަޔާންކުރައްވައިފިއެވެ.
ހއ. މާރަންދޫގެ ރައްޔިތުންނާ މުޚާޠަބުކުރައްވަމުން ވިދާޅުވި ގޮތުގައި، މި ދަތުރުފުޅުތަކަކީ ބޭކާރު ޚަރަދެއް ކުރެއްވުމަށް ކުރައްވާ ދަތުރުފުޅުތަކެއް ނޫނެވެ. އޭގެ ބަދަލުގައި، މިއީ ރަށްރަށުގެ ތަރައްޤީއަށް ކުރައްވާ ސީރިއަސް މަސައްކަތްތަކެކެވެ. ރައީސް ފާހަގަކުރެއްވި ގޮތުގައި، ކަންކަން ލަސްވެގެން ދިއުމުން ލިބޭ ގެއްލުމަކީ މާ ބޮޑު ބޭކާރު ޚަރަދަކަށް ވެގެންދާނެ ކަމެކެވެ.
އެމަނިކުފާނު އިތުރަށް ވިދާޅުވި ގޮތުގައި، މާލޭގައި އަރާމުގައި ތިއްބެވުމުގެ ބަދަލުގައި، ކަމާގުޅޭ ވަޒީރުންނާއެކު ރަށްރަށަށް ވަޑައިގެން، ކައުންސިލްތަކާއި މުއައްސަސާތަކުގެ ޒިންމާދާރު ވެރިންނާ އެކު މަޝްވަރާކުރައްވައި، ދިމާވެފައިވާ މައްސަލަތަކަށް އަވަސް ހައްލު ހޯއްދެވުމަށް މަސައްކަތް ކުރެއްވުމަކީ ކަންކަން އަވަސް ކުރުމަށް އެޅޭ މުހިންމު ފިޔަވަޅެކެވެ.
ކޮންމެ ރަށަކަށް ވަޑައިގަންނަވާއިރު، އެރަށެއްގެ ޒިންމާދާރު ފަރާތްތަކާއެކު ސަރުކާރުގެ މަސައްކަތު ބައްދަލުވުންތައް ބާއްވަވައި، އެ ބައްދަލުވުންތަކުން ނުކުންނަ ނަތީޖާތަކާއި ނިންމެވުންތައް ރައްޔިތުންނާ ހިއްސާކުރެއްވުމަކީ މި ދަތުރުފުޅުތަކުގެ މައިގަނޑު މަޤްޞަދު ކަމުގައި ރައީސް ވިދާޅުވިއެވެ.
