ތަހުގީގީ އިދާރާތަކުން ކުރިއަށްގެންދާ ތަހުގީގުތަކަށް ހުރިހާ ކައުންސިލްތަކުން އެއްބާރުލުން ދިނުމަށް ލޯކަލް ގަވަމެންޓް އޮތޯރިޓީ (އެލްޖީއޭ) އިން މިއަދު އަންގައިފިއެވެ. އެލްޖީއޭއިން މިއަދު ނެރުނު ބަޔާނުގައި ފާހަގަކޮށްފައިވަނީ، ޤާނޫނީ ގޮތުން ކައުންސިލަރުން އެންމެހާ ޤާނޫނުތަކަށް ތަބާވާން ޖެހޭއިރު، ބައެއް ތަހުގީގީ އިދާރާތަކަށް ކައުންސިލްތަކުގެ އެއްބާރުލުން ނުލިބޭ ކަމުގެ ޝަކުވާ އެ އިދާރާއަށް ލިބިފައިވާ ކަމަށެވެ.
މި އެންގުން އައިސްފައިވަނީ ގދ. ތިނަދޫ ސިޓީ ކައުންސިލާ ގުޅޭގޮތުން ބަލަމުންދާ ކޮރަޕްޝަންގެ މައްސަލައިގެ ތަހުގީގަށް އެ ކައުންސިލްގެ އެއްބާރުލުން ނުލިބޭކަމަށް އެންޓި ކޮރަޕްޝަން ކޮމިޝަން (އޭސީސީ) އިން ފާހަގަކުރުމާ ގުޅިގެންނެވެ. އޭސީސީން ކައުންސިލަށް ވަދެ ބައެއް ލިޔުންތައް ގެންދިއުމުން، ކައުންސިލުން ވަނީ އޭސީސީގެ ނަމުގައި ބަޔަކު ތިނަދޫ ސިޓީ ކައުންސިލަށް ވަދެ ގިނަ އަދަދެއްގެ ތަކެތި "ވަގަށް ނަގާފައިވާ" ކަމަށް ބުނެ ފުލުހުންނަށް މައްސަލަ ހުށަހަޅާފައެވެ.
އޭސީސީން މި މައްސަލައިގައި ބުނެފައިވަނީ، ތިނަދޫ ސިޓީ ކައުންސިލްގެ އެއްބާރުލުން ނުލިބުނު ނަމަވެސް، ޤާނޫނުއަސާސީ އާއި އޭސީސީގެ ޤާނޫނުގެ ދަށުން ފުރިހަމަ ކުރަންޖެހޭ އެންމެހާ އިޖުރާއަތްތައް ފުރިހަމަކޮށް، ތަހުގީގަށް ބޭނުންވާ ލިޔެކިޔުންތައް ހޯދާފައިވާ ކަމަށެވެ. ތިނަދޫ ކައުންސިލާ ގުޅޭގޮތުން ތަހުގީގުކުރާ މައްސަލަތަކުގެ ތަފްސީލު އޭސީސީން އަދި ހާމަކޮށްފައި ނުވި ނަމަވެސް، އެނގިފައިވާ ގޮތުގައި ކޮރަޕްޝަނަށް ތުހުމަތުކުރެވޭ ބޮޑު ހަ މައްސަލައެއް އޭސީސީން ދަނީ ބަލަމުންނެވެ. އަދި ކައުންސިލްގެ އިދާރާއަށް އޭސީސީން ވަދެފައިވަނީ ހެކި ނައްތާލުމުގެ ބިރު އޮތުމުން ކަމަށްވެސް އެނގިފައިވެއެވެ.
