ފޮރިން މިނިސްޓަރު ޑރ. އަބްދުﷲ ހަލީލު ސައުދީ އަރަބިއްޔާގެ ހާރިޖީ ވަޒީރު ފައިސަލް ބިން ފަރްހާންގެ އަލް ސައޫދުގެ ދައުވަތަކަށް ރޭ ސައުދީ އަރަބިއްޔާއަށް ވަޑައިގެންފިއެވެ.
ފޮރިން މިނިސްޓްރީން ރޭ ނެރުނު ބަޔާނުގައި ވިދާޅުވި ގޮތުގައި، މި ދަތުރުފުޅުގައި ހަލީލު ސައުދީގެ ހާރިޖީ ވަޒީރާ ބައްދަލުކުރައްވައި، ދެ ގައުމުގެ ދެމެދުގައި އޮންނަ ޒަމާންވީ ރަހުމަތްތެރިކަމުގެ ގުޅުން އިތުރަށް ހަރުދަނާކުރެއްވުމާއި އެކި ދާއިރާތަކުން އެއްބާރުލުން އިތުރުކުރެއްވުމާ ގުޅޭގޮތުން މަޝްވަރާކުރައްވާނެއެވެ. މީގެއިތުރުން، ސައުދީގެ ކޮމާސް މިނިސްޓަރާވެސް ބައްދަލުކުރައްވާ، ދެ ގައުމުގެ ވިޔަފާރީގެ ގުޅުން ވަރުގަދަކުރެއްވުމާއި ރާއްޖޭގައި ސައުދީގެ އިންވެސްޓްމަންޓްތައް އިތުރުކުރެއްވުމަށް މަގުފަހިކުރެއްވުމާ ބެހޭގޮތުން މަޝްވަރާކުރައްވާނެ ކަމަށް ބަޔާނުގައި ފާހަގަކުރައްވާފައިވެއެވެ.
މި ދަތުރުފުޅުގައި ހަލީލާއެކު ފޮރިން މިނިސްޓްރީގެ ބައިލެޓަރަލް ސެކްރެޓަރީ ޑރ. ހާލާ ހަމީދާއި ޖޮއިންޓް ސެކްރެޓަރީ ހަދީޖާ ނަޖީހާ ބައިވެރިވެވަޑައިގަންނަވައެވެ. ފާހަގަކޮށްލެވޭ ގޮތުގައި، ރައީސް މުއިއްޒު ވެރިކަމާ ހަވާލުވެވަޑައިގެން އެންމެ ފުރަތަމަ ރަސްމީ ދަތުރުފުޅެއް ކުރެއްވުމަށް ހަމަޖެހިފައިވީ ސައުދީ އަރަބިއްޔާއަށް ނަމަވެސް، އެ ދަތުރުފުޅު ފަސްކުރެއްވުމާ ގުޅިގެން ފުރަތަމަ ވަޑައިގެންނެވީ ތުރުކީއަށެވެ. އޭގެފަހުން، ސައުދީ ރަސްގެފާނުގެ ދައުވަތަކަށް އުމުރާއަށާއި އަރަބް-އިސްލާމިކް ސަމިޓަށް ވަނީ ސައުދީއަށް ވަޑައިގެންފައެވެ.
މިއީ މި ސަރުކާރުގައި ރާއްޖޭގެ ފޮރިން މިނިސްޓަރަކު ސައުދީއަށް ކުރައްވާ ދެވަނަ ދަތުރުފުޅެވެ. މީގެކުރިން މިދިޔަ އަހަރުގެ އޮގަސްޓު މަހު އޭރުގެ ފޮރިން މިނިސްޓަރު އަދި މިހާރުގެ ފިނޭންސް މިނިސްޓަރު މުސާ ޒަމީރު ވަނީ ރައީސްގެ ހާއްސަ ސިޓީއެއް ހިއްޕަވައިގެން ސައުދީއަށް ވަޑައިގެންފައެވެ.
