ޒަކާތު ހައުސްއިން އިއްޔެއިން ފެށިގެން މުދަލު ޒަކާތުގެ ނިސާބު އައު އަގަކަށް ބަދަލުކޮށްފިއެވެ. މިގޮތުން އިސްލާމިކް މިނިސްޓްރީގެ ދަށުން ހިންގާ މި މުއައްސަސާއިން ކަނޑައެޅި އައު ނިސާބަކީ 8،800.05 ރުފިޔާއެވެ. މިއީ މިދިޔަ އަހަރުގެ އޮކްޓޯބަރު މަހުން ފެށިގެން ޢަމަލުކުރަމުން އައި 9،240.35 ރުފިޔާއަށްވުރެ ދަށް އަގެކެވެ.
މުދަލު ޒަކާތުގެ ނިސާބަކީ މުދަލުގެ ޒަކާތް ނެރުން ވާޖިބުވާ އެންމެ މަދު މިންވަރެވެ. ފައިސާގެ ޒަކާތް ދެއްކުމުގައި އަގު ކަނޑައަޅަނީ ރަނުގެ ނުވަތަ ރިހީގެ އަގަށް ބިނާކޮށެވެ. ދިވެހިރާއްޖޭގައި ނިސާބު ކަނޑައަޅާ މިންގަނޑަކީ ރިހީގެ ނިސާބެވެ. އަދި ރިހީގެ އަގު ކަނޑައަޅަނީ މޯލްޑިވްސް މަނިޓަރީ އޮތޯރިޓީންނެވެ.
ޒަކާތް ނެރުން މުސްލިމުންގެ މައްޗަށް ވާޖިބުވަނީ އެމީހެއްގެ މިލްކިއްޔާތުގައިވާ މުދަލުގައި ނިސާބު ހަމަވެ، އެ މުދާ އެމީހެއްގެ މިލްކުގައި ހިޖުރީ އަހަރެއް ފުރިހަމަވުމުންނެވެ.
