އިންޑިއާގެ ނޭޝަނަލް ފޮރެންސިކް ސައިންސް ޔުނިވަރސިޓީން ރާއްޖޭގައި ބައިނަލްއަގުވާމީ ފެންވަރުގެ ފޮރެންސިކް ލެބޯޓަރީއެއް ގާއިމުކުރުމުގައި އެހީތެރިކަން ފޯރުކޮށްދޭން އެއްބަސްވެއްޖެއެވެ. މިކަން ހަމަޖެހުނީ އެސިސްޓެންޓް ކޮމިޝަނަރ އޮފް ޕޮލިސް އަހުމަދު ޝިފާން އިސްކޮށް ހުންނެވި ފުލުހުންގެ އިސް ވަފުދެއް އިންޑިއާއަށް ކުރި ދަތުރެއްގައި އެ ޔުނިވަރސިޓީއާއެކު ކުރެވުނު މަޝްވަރާތަކާ ގުޅިގެންނެވެ.
ފުލުހުންގެ އޮފީހުން މިއަދު ނެރުނު ނޫސްބަޔާނެއްގައި ބަޔާންކޮށްފައިވާ ގޮތުގައި، މި ދަތުރުގައި ވަފުދުން ވަނީ އިންޑިއާގެ އެހެން ދެ މަރުކަޒަކާވެސް ބައްދަލުކުރައްވާފައެވެ. އަދި ޒަމާނީ ޑިޖިޓަލް ފޮރެންސިކް ލެބޯޓަރީއެއް ތަރައްގީކުރުމުގެ އިތުރުން، އެ ޔުނިވަރސިޓީން ވަނީ ރާއްޖޭގައި ކެމްޕަހެއް ގާއިމުކުރުމަށްވެސް ހުށަހަޅާފައެވެ. މި މަޝްރޫއުތަކާ ގުޅޭ އިތުރު މަޝްވަރާތައް ކުރިއަށް ގެންދިއުމަށްވެސް ދެފަރާތުން ވަނީ އެއްބަސްވެފައެވެ.
މީގެއިތުރުން، ފުލުހުންގެ ތަހުގީގީ އަދި އޮޕަރޭޝަނަލް ގާބިލުކަން އިތުރުކުރުމަށް އިންޑިއާގެ މަތީ ފެންވަރުގެ ތަމްރީނު މަރުކަޒުތަކާއެކު ކުރިން ވެފައިވާ އެއްބަސްވުންތައް ތަންފީޒުކުރުމާ ގުޅޭގޮތުން މަޝްވަރާކުރެވުނެވެ. މި މަޝްވަރާތަކުގައި ސައިބަރ ފޮރެންސިކްސް އަދި އިންޓެލިޖެންސްގެ ދާއިރާތަކުން މަތީ ފެންވަރުގެ ތަމްރީނުތައް ހިމެނެއެވެ.
