ނޭޝަނަލް ފްލެގް ކެރިއަރ، މޯލްޑިވިއަން އިން ވައިޑް-ބޮޑީ އެއަރކްރާފްޓެއް ބޭނުންކޮށްގެން ޗައިނާއަށް ފުރަތަމަ ފަހަރަށް ކުރާ ސީދާ ދަތުރުތަކަށް ޚާއްޞަ ޕްރޮމޯޝަނަލް އަގުތަކެއް އާންމު ކޮށްފިއެވެ. މޯލްޑިވިއަން އިން ބުނިގޮތުގައި ވައިޑް-ބޮޑީ އެއަރކްރާފްޓް އިން ޗައިނާގެ ތިން މައި ސިޓީއަކަށް ހަފްތާއަކު ތިން ދަތުރު ކުރާނެއެވެ. އެއީ ޝަންހާއީ، ޗެންގްދޫ އަދި ބީޖިންގ އަށެވެ.
ފުރަތަމަ ދަތުރު ޖަނަވަރީ 22 ވަނަ ދުވަހު ޗެންގްދޫ އަށް ފުރުމަށް ހަމަޖެހިފައިވާއިރު، ބީޖިންގ އަށް 24 ވަނަ ދުވަހު އަދި ޝަންހާއީ އަށް 27 ވަނަ ދުވަހު ފުރާނެއެވެ. އިތުރު ދަތުރުތައް މި މަންޒިލްތަކަށް ޖަނަވަރީ 30، ފެބްރުވަރީ 1 އަދި ފެބްރުވަރީ 4 ގައި ރޭވިފައިވެއެވެ.
މި ދަތުރުތަކަށް ކަނޑައެޅިފައިވާ ޚާއްޞަ އަގުތަކަކީ:
މާލެ – ޗެންގްދޫ ދެކޮޅު ޓިކެޓް: 688 އެމެރިކާ ޑޮލަރު
މާލެ – ބީޖިންގ ދެކޮޅު ޓިކެޓް: 788 އެމެރިކާ ޑޮލަރު
މާލެ – ޝަންހާއީ ދެކޮޅު ޓިކެޓް: 777 އެމެރިކާ ޑޮލަރު
މޯލްޑިވިއަން އިން ބުނިގޮތުގައި 40 ކިލޯގެ ލަގެޖް އެލަވަންސަކާއި އިންފްލައިޓް މީލްސް ޓިކެޓްގެ އަގުގައި ހިމެނިފައިވެއެވެ. މި ޕްރޮމޯޝަނަލް އަގުތައް ކޮންމެ މަންޒިލަކަށް ފުރަތަމަ ދެ ދަތުރަށް އެކަނި ހަމަޖެހިފައިވާއިރު، މިއީ ފަސިންޖަރުންނަށް އަތްފޯރާ އަގެއްގައި މޯލްޑިވިއަންގެ ޚިދުމަތް ތަޖުރިބާކުރުމުގެ ފުރުސަތު ދިނުމަށް އަމާޒުކޮށްފައިވާ އަގުތަކެކެވެ.
މި ދަތުރުތަކުގައި ބޭނުންކުރާ ވައިޑް-ބޮޑީ އެއަރކްރާފްޓްގައި ތިން ކެބިން ކްލާސް ހިމެނެއެވެ. އެއީ 18 ސީޓް ބިޒްނަސް ކްލާހުގައި، 36 ސީޓް ޕްރިމިއަމް އިކޮނޮމީގައި އަދި 210 ސީޓް އިކޮނޮމީ ކްލާހުގައެވެ. މުޅި އެއަރކްރާފްޓްގެ ޖުމްލަ ސީޓް ކެޕޭސިޓީއަކީ 264 އެވެ.
މޯލްޑިވިއަންގެ ޗައިނާގެ މާކެޓަށް ކުރާ މި ފުޅާވުމަކީ ބައިނަލްއަޤްވާމީ ގުޅުން އިތުރުކޮށް، ރާއްޖެ ފަތުރުވެރިކަމުގެ މަންޒިލެއްގެ ގޮތުގައި ކުރިއެރުވުމަށް އަމާޒުކޮށްފައިވާ ކަމެކެވެ. ޗައިނާއަކީ ރާއްޖޭގެ ފަތުރުވެރިކަމުގެ އެންމެ މުހިންމު މާކެޓްތަކުގެ ތެރެއިން އެއް މާކެޓް ކަމުގައިވާއިރު، މިއީ ޗައިނާއާއި ރާއްޖެއާ ދެމެދު އޮންނަ ފަތުރުވެރިކަމުގެ ގުޅުން އިތުރަށް ވަރުގަދަކުރުމަށް އެޅޭ މުހިންމު ފިޔަވަޅެއް ކަމުގައި މޯލްޑިވިއަން އިން ބުނެފައިވެއެވެ.
