މާލޭގައި ހިންގުނު މަސްތުވާތަކެތީގެ އޮޕަރޭޝަނެއްގައި ތިން މީހަކު ހައްޔަރުކޮށްފައިވާ ކަމަށް ފުލުހުން މައުލޫމާތު ދީފިއެވެ. މި އޮޕަރޭޝަން ކުރިއަށްގެންގޮސްފައިވަނީ މަސްތުވާތަކެތި ބޭނުންކޮށް، ގެންގުޅެ އަދި އެތަކެތީގެ ވިޔަފާރިކުރާ ކަމަށް ތުހުމަތުކުރެވޭ މައްސަލައަކާ ގުޅިގެންނެވެ.
މި މަހުގެ 13 ވަނަ ދުވަހު ހިންގުނު އޮޕަރޭޝަނުގައި ކައުންޓަރ ނާކޮޓިކްސް އިންޓެލިޖެންސާއި ޑްރަގް އެންފޯސްމަންޓުން ހައްޔަރުކޮށްފައިވަނީ ގއ. މާމެންދޫ މޫނިމާގެ، 27 އަހަރުގެ ނަޒީހް ޝަރީފް، ޏ. ފުވައްމުލައް ދަޑިމަގު ވައިގެ، 31 އަހަރުގެ މުހްސިން މުހައްމަދު އަދި މާލެ، ދަފްތަރު ނަންބަރު ދރ.465، 40 އަހަރުގެ މުހައްމަދު ޝާން އަބްދުލްގަނީ އެވެ.
ފުލުހުންގެ މައުލޫމާތުގައިވާ ގޮތުން، މި ތިން މީހުން ހައްޔަރުކޮށް ބަލައިފާސްކުރިއިރު މަސްތުވާތަކެތި ކަމަށް ބެލެވޭ 98.37 ގުރާމްގެ އެއްޗެއް ފެނިފައިވެއެވެ. މި މައްސަލައާ ގުޅިގެން އެ މީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، ތިން މީހުން ވެސް 15 ދުވަހަށް ބަންދުކުރުމަށް ކޯޓުން އަމުރުކޮށްފައިވެއެވެ. މި މައްސަލައިގެ ތަހުގީގު މިހާރު ދަނީ ކުރިއަށެވެ.
