މޯލްޑިވްސް އިމިގްރޭޝަނުން މިއަދު ހިންގި ޚާއްސަ އޮޕަރޭޝަނެއްގައި ހީނާމާގެ ޕާކިންގ ސަރަހައްދުން 17 ބިދޭސީން ބެލުމުގެ ދަށަށް ގެނެސްފިއެވެ. މި އޮޕަރޭޝަނަކީ ރާއްޖޭގައި ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް ރައީސް ޑރ. މުހައްމަދު މުއިއްޒުގެ އިރުޝާދުގެ ދަށުން ކުރިއަށްގެންދާ މަސައްކަތުގެ ބައެކެވެ.
މި އޮޕަރޭޝަންގައި، ނުގަވާއިދުން އުޅޭ ބިދޭސީން ދިރިއުޅޭ ތަންތަނާއި އާންމުންގެ ސަލާމަތާއި ރައްކާތެރިކަމަށް ނުރައްކާވާ ގޮތަށް ކާބޯތަކެތި ތައްޔާރުކުރާ ތަންތަން ބަލައި ފާސްކުރެވުނެވެ. އިމިގްރޭޝަނުން މައުލޫމާތު ދިންގޮތުގައި، ހީނާމާގެ ޕާކިންގ ސަރަހައްދަކީ ބިދޭސީންގެ ބޮޑު ކޮންޓްރޯލެއް އޮންނަ ތަނެއްގެ ގޮތުގައި އާންމުން ކަންބޮޑުވުން ފާޅުކުރަމުން އަންނަ ސަރަހައްދެކެވެ.
އިމިގްރޭޝަނުން މި ސަރަހައްދުގައި ހިންގި ޚާއްސަ ރެއިޑު އޮޕަރޭޝަންގައި، އެ ސަރަހައްދަށް އެއްވެއުޅޭ ބިދޭސީންނާއި، ބިދޭސީން އިސްވެތިބެ ހިންގަމުންދާ ފިހާރަތަކާއި ކެފޭތައް ބަލައި ފާސްކުރެވުނެވެ. މި ބަލައި ފާސްކުރުމުގައި ސައްހަ ވިސާނެތި ގަވާއިދާ ޚިލާފަށް މަސައްކަތްކުރަމުންދިޔަ 17 ބިދޭސީން ފާހަގަކުރެވި، އިމިގްރޭޝަންގެ ބެލުމުގެ ދަށަށް ގެނެވުނެވެ.
އިމިގްރޭޝަނުން މިހާރު ވަނީ ބިދޭސީން ދިރިއުޅޭ ގެތައް ބަލައި ފާސްކުރުމުގެ އޮޕަރޭޝަނަކާއި، ގަވާއިދާ ޚިލާފަށް ވިޔަފާރިކޮށް، ސައްހަ ވިސާނެތި އުޅެމުންދާ ބިދޭސީން ދެނެގަތުމުގެ ޚާއްސަ އޮޕަރޭޝަނެއް ފަށާފައެވެ. އިމިގްރޭޝަންގެ މަޤްސަދަކީ ރާއްޖޭގައި ގަވާއިދާ ޚިލާފަށް އުޅޭ ބިދޭސީންގެ މައްސަލައަށް އަވަސް ހައްލެއް ހޯދުމެވެ. އަދި މި މަސައްކަތް ކުރިއަށް ގެންދާނީ ސަރުކާރުގެ އިދާރާތަކާ ގުޅިގެން، މިފަދަ ބިދޭސީންގެ ސަބަބުން މުޖުތަމަޢުއަށް ކުރިމަތިވާ އުނދަގޫތަކުން ރައްޔިތުން ސަލާމަތްކުރުމަށެވެ.
އިމިގްރޭޝަނުން އަމާޒު ހިފާފައިވަނީ ޒަމާނީ ވަސީލަތްތަކާއެކު، ޚިދުމަތްތައް އިތުރަށް ހަރުދަނާކޮށް، ރައްޔިތުންނާއި ޚިދުމަތް ހޯދާ އެންމެހައި ފަރާތްތަކަށް ލުއިފަސޭހަ ގޮތެއްގައި ޚިދުމަތް ފޯރުކޮށްދިނުމަށެވެ.
