ކުރީ ސަރުކާރުން ތަޢާރަފުކުރި ގެދޮރުވެރިޔާ ސްކީމްގެ ދަށުން އިމާރާތްކުރަމުންދާ 4،000 ފްލެޓް ލިބޭ ފަރާތްތަކުގެ ލިސްޓު އަލުން ވެރިފައިކުރުމަށް ސަރުކާރުން ނިންމައިފިއެވެ.
މިކަން އިއުލާންކުރެއްވީ ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ހައުސިން މިނިސްޓަރު ޑރ. އަބްދުﷲ މުއްތަލިބެވެ.
މިނިސްޓަރު މުއްތަލިބް ވިދާޅުވި ގޮތުގައި، ވެރިފިކޭޝަން ޕްރޮސެސް ކުރިއަށް ގެންދާނީ 2023 ވަނަ އަހަރުގެ ނޮވެމްބަރު 15 ވަނަ ދުވަހު އާންމުކުރި ލިސްޓަށެވެ.
"އަޅުގަނޑުމެން މިހާރު ނިންމާފައިވާނީ ފްލެޓަށް އެދިފައިވާ ފޯމު ލައިފައިވާ ހުރިހާ ފަރާތްތައް އަލުން އިވެލުއޭޓް ކުރުމުގެ ބަދަލުގައި 15 ނޮވެމްބަރު 2023 ގައި ގެޒެޓްކޮށްފައިވާ ލިސްޓް ވެރިފިކޭޝަން ޕްރޮސެސްއެއް ކުރިއަށް ގެންދިއުމަށް،"
މިނިސްޓަރު ވިދާޅުވިއެވެ.
މި ޕްރޮސެސްގައި، އެޕްލިކޭޝަން ހުށަހެޅި ޕޯޓަލްގައިވާ އިރުޝާދުތަކަށް ރިޢާޔަތްކުރާނެ ކަމަށް މިނިސްޓަރު ފާހަގަކުރެއްވިއެވެ. މާލޭގައި ދިރިއުޅޭތާ 15 އަހަރު ވެފައިވާކަން ސާބިތުކުރުމަށް ހުށަހަޅަންޖެހޭ ލިޔެކިޔުންތަކުގެ ތެރޭގައި ވަޒީފާ އަދާކުރިކަމުގެ ލިޔުންތަކާއި މާލޭގައި ކިޔެވިކަމުގެ ލިޔުންތައް ހިމެނެއެވެ.
އޮޑިޓަރ ޖެނެރަލް އޮފީހުގެ ލަފާގެ މަތިން، ޕޯޓަލްގައި ނުހިމެނޭ ލިޔުންތައް ގާނޫނީ ގޮތުން ބަލައިނުގަނެވޭނެ ކަމަށް މިނިސްޓަރު ވިދާޅުވިއެވެ. އަދި އޭސީސީން ކުރި ތަޙްޤީޤުގައި މާލޭގައި މެދުނުކެނޑި އުޅޭ މުއްދަތު ބެލުމުގައި އެއް ހަމައެއް ގެންގުޅެފައިނުވާކަން ފާހަގަކުރެވިފައިވާ ކަމަށްވެސް މިނިސްޓަރު ވިދާޅުވިއެވެ.
މި ވެރިފިކޭޝަން ޕްރޮސެސްގައި ތަޢުލީމު ހާސިލުކުރުމަށް ރާއްޖެއިން ބޭރަށްދާ މީހުންނާއި ވަޒީފާގެ ގޮތުން މާލެއިން ބޭރުގައި ނުވަތަ ރާއްޖެއިން ބޭރުގައި މަސައްކަތްކުރާ ފަރާތްތަކާ މެދު ޢަމަލުކުރާނެ ގޮތްތައްވެސް ކަނޑައެޅިގެންދާނެއެވެ.
