ރައީސް ޑރ. މުޙައްމަދު މުއިއްޒު، މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) ގެ ހުސްވެފައިވާ މެމްބަރުކަމުގެ ދެ މަޤާމަށް ހުށަހެޅުއްވި ނަންތަކުގެ ތެރެއިން، ރައީސް އޮފީހުގެ ކުރީގެ ތަރުޖަމާން އިބްރާހީމް މުއާޒު އަލީ (ޓީވީ މުއާ) އިންޓަވިއު މަރުޙަލާއިން ކަޓައިފިއެވެ.
މިނިވަން މުއައްސަސާތަކުގެ ކޮމިޓީން މިއަދު ނެރުނު ރިޕޯޓުގައިވާ ގޮތުން، ބްރޯޑްކޮމްގެ މެމްބަރުކަމަށް އެންމެ މަތިން މާކްސް ލިބިވަޑައިގެންފައިވަނީ އަލްއުސްތާޛާ އާމިނަތު ސަރާހަތު އިއްޒަތަށެވެ. އޭނާއަށް 89 މާކްސް ލިބިވަޑައިގެންފައިވާއިރު، ދެވަނައަށް އެންމެ މަތިން މާކްސް ލިބިވަޑައިގެންފައިވަނީ 84 މާކްސްއާއެކު ޝިފްޒާ މުސްތަފާއަށެވެ. ރައީސްގެ ލިސްޓުގެ އެއްވަނާގައި އޮތް ނަން ކަމުގައިވާ ރައްޔިތުންގެ މަޖިލީހުގެ ކުރީގެ މެންބަރު މުޙައްމަދު އަބްދުﷲ (މުހަންމާ) އަށް 79 މާކްސް ލިބިފައި ވެއެވެ. އަދި ޝިމްލާ އަޙްމަދަށް 77 މާކްސް ލިބިފައި ވެއެވެ.
މަޖިލިސް ގަވާއިދުގައިވާ ގޮތުން، ވޯޓަށް އެހުމަށް ފޮނުވޭނީ 75 ޕަސެންޓަށްވުރެ މަތިން މާކްސް ލިބޭ ނަންތަކެވެ. އިންޓަވިއު މަރުޙަލާއިން ކެޓިފައިވާ މުއާޒަށް ލިބިފައިވަނީ 68 މާކްސްއެވެ.
މުއާޒުގެ ސިޔާސީ މަސްރަޙަށް ބަލާއިރު، ރައީސް އޮފީހުގެ ތަރުޖަމާނެއްގެ ގޮތުގައި މަސައްކަތްކުރެއްވުމުގެ ކުރިން އޭނާ މަސައްކަތްކުރައްވާފައިވަނީ ދައުލަތުގެ މީޑިއާގައެވެ. ކުރީގެ ރައީސް ޔާމީންގެ ވެރިކަން ނިމުމަށްފަހު، އޭނާ ވަނީ އެމްޓީޑީގެ ނައިބު ރައީސްކަން ކުރައްވާފައެވެ. އަދި 2023 ގެ ރިޔާސީ އިންތިޚާބާ ދިމާކޮށް އެމްޑީޕީއަށް ބަދަލުވެފައި ވެއެވެ.
މިނިވަން މުއައްސަސާތަކުގެ މެންބަރުންނަށް މާކްސްދިނުމުގައި އެންމެ ބޮޑު އިސްކަމެއް ދެނީ ހާސިލްކޮށްފައިވާ ތަޢުލީމާއި މަޤާމުގެ މަސައްކަތާ ހުރި ގުޅުމަށް ކަމަށްވާއިރު، އެ ބަޔަށް 20 މާކްސް ދެއެވެ. މީގެ އިތުރުން ތަޖުރިބާއާއި، ދުރު މުސްތަޤުބަލުގެ ތަޞައްވުރު އަދި އިޚްލާޞްތެރިކަމަށް ވަކިވަކިން 15 މާކްސް ދެއެވެ.
