ފުލުހުންނާއި އިމިގްރޭޝަނުން ގުޅިގެން ކުރިއަށް ގެންދާ އޮޕަރޭޝަނެއްގައި، ރާއްޖޭގައި ހަށިވިއްކުމުގެ ވިޔަފާރި ކުރަމުން ދިޔަ ވިއެޓްނާމްގެ ދެ އަންހެނަކު ހައްޔަރުކޮށް، ރާއްޖެއިން ޑީޕޯޓްކޮށްފިއެވެ.
އިމިގްރޭޝަނުން މަޢުލޫމާތު ދިން ގޮތުގައި، މި ދެ އަންހެނުންގެ ތެރެއިން އެކަކީ ވޯކް ވިސާގައި ރާއްޖޭގައި އުޅެމުން އައި 40 އަހަރުގެ މީހެކެވެ. އަނެކަކީ ޓޫރިސްޓް ވިސާގައި ރާއްޖޭގައި ދިރިއުޅެމުން އައި 41 އަހަރުގެ އަންހެނެކެވެ. މި ދެ އަންހެނުންނަކީވެސް ފުޅާ ދާއިރާއެއްގައި ހަށިވިއްކުމުގެ ވިޔަފާރި ކުރަމުން ދިޔަކަން ތަޙުޤީޤަށް ހާމަވުމާ ގުޅިގެން، އިމިގްރޭޝަނުގެ ބެލުމުގެ ދަށަށް ގެނެވުނު ދެ މީހުންނެވެ.
ހަށިވިއްކުމުގެ ވިޔަފާރި ހުއްޓުވުމަށް އިމިގްރޭޝަނުން ކުރަމުންދާ މަސައްކަތުގެ ދަށުން، 2023 ވަނަ އަހަރުގެ ފަހުކޮޅުގައިވެސް މި ފަދަ ވިޔަފާރީގައި އުޅުނު ހަތް މީހަކާއި، އޭޖެންޓުންގެ ގޮތުގައި މަސައްކަތްކުރި ދެ ބިދޭސީ ފިރިހެނުން ވަނީ ރާއްޖެއިން ޑީޕޯޓްކޮށްފައެވެ.
