ފުލުހުންގެ އިދާރާއިން މިއަދު ވަނީ ސައުތު ކޭޓަރިންގެ މުވައްޒަފުންތަކަކަށް މުސާރަ ނުދޭކަމަށް ބުނާ މައްސަލައެއް ތަޙުޤީޤު ފަށައިފިއެވެ. މި މައްސަލަ ފުލުހުންގެ ސަމާލުކަމަށް އައީ އަލިކިލެގެފާނު މަގުގައި ހުންނަ ސައުތު ކޭޓަރިންގެ އޮފީސް ކުރިމަތީގައި އެ ތަނުގެ މުވައްޒަފުންތަކެއް އިހުތިޖާޖުކުރުމާ ގުޅިގެންނެވެ.
ފުލުހުންގެ އިދާރާއިން މީޑިއާތަކާ ހިއްސާކުރި މަޢުލޫމާތުގައިވާ ގޮތުން، މި މައްސަލައިގެ ތަޙުޤީޤު ކުރިއަށް ގެންދަނީ އެ އިދާރާގެ އެންޓި ހިއުމަން ޓްރެފިކިން ޑިޕާޓްމަންޓުންނެވެ. އެހެންނަމަވެސް، މުވައްޒަފުންނަށް މުސާރަ ނުދީ ހިފަހައްޓާފައިވާ މުއްދަތާ ބެހޭ އިތުރު މަޢުލޫމާތެއް ފުލުހުން ހާމަކޮށްފައެއް ނުވެއެވެ.
ފާހަގަކޮށްލެވޭ ކަމަކީ، މިއީ ފަހަކަށް އައިސް ބިދޭސީ މުވައްޒަފުންތަކަކަށް މުސާރަ ނުދިނުމާ ގުޅިގެން ހިނގި ދެވަނަ އިހުތިޖާޖެވެ. މި މައްސަލައިގެ ތަޙުޤީޤު ކުރިއަށްދާ ގޮތާ ބެހޭ އިތުރު މަޢުލޫމާތު ލިބުމުން ހާމަކުރާނެ ކަމަށް ފުލުހުންގެ އިދާރާއިން ބުނެފައިވެއެވެ.
