ވާނުވާ މައްސަލާގައި، ޔޫތު ފޯ ޔުނިޓީން މިރޭވެސް މާލޭގައި މުޒާހަރާ ބާއްވަން ނިންމައިފިއެވެ. "އަނިޔާވެރިކަމާ ދެކޮޅަށް" މި ނަމުގައި ބާއްވާ މި މުޒާހަރާ އޮންނާނީ މިރޭ 8:30 ގައި އާޓިފިޝަލް ބީޗު ސަރަހައްދުގައެވެ.
ޝަރީޢަތް ނުނިމި ދިގު މުއްދަތަކަށް "ވާނުވާގައި" މީހުން ބޭތިއްބުން ނިމުމަކަށް ގެނައުމަށް ގޮވާލުމަކީ މި މުޒާހަރާގެ މައިގަނޑު މަޤްޞަދު ކަމަށް ޔޫތު ފޯ ޔުނިޓީން ބުނެފައިވެއެވެ. އަދި ޝަރީޢަތްތައް އަވަސްކުރުމަކީ މި ސަރުކާރުގެ ވަޢުދެއް ކަމަށްވާތީ، އެ ވަޢުދު ފުއްދުމަށް ސަރުކާރަށް ބާރުއެޅުމުގެ ގޮތުން މި މުޒާހަރާ ބާއްވާ ކަމަށްވެސް ޔޫތު ފޯ ޔުނިޓީން ފާހަގަކޮށްފައިވެއެވެ.
