ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ހުޅުމާލޭގެ ދެވަނަ ފިޔަވަހީގައި ޤާއިމުކޮށްފައިވާ 132 ކިލޯވޯލްޓްގެ ހައިވޯލްޓޭޖް ސަބްސްޓޭޝަން ގްރޭޓަރ މާލެ އިންޓަކަނެކްޝަން ގްރިޑާ ގުޅާލުމުގެ މަސައްކަތް ވަނީ ކާމިޔާބުކަމާއެކު ނިންމާލާފައެވެ.
ސްޓެލްކޯގެ ޓްރާންސްމިޝަން އެންޑް ޑިސްޓްރިބިއުޝަންގެ ޖެނެރަލް މެނޭޖަރު އިބްރާހިމް ނާޝިދު ވިދާޅުވި ގޮތުގައި، މި މަސައްކަތަކީ ކުރިން އަންދާޒާކުރެވިފައިވާ ގޮތާ ޚިލާފަށް ވަރަށް އަވަހަށް ނިންމާލެވިފައިވާ މަސައްކަތެކެވެ. އެގޮތުން، ކުރިން މާލޭގެ 10 ސަރަހައްދަކުން ކަރަންޓު މެދުކަނޑާލަން ޖެހޭނެކަމަށް ލަފާކުރެވުނު ނަމަވެސް، މޫސުން ރަނގަޅުވުމާއެކު މާލޭގެ ދެ ސަރަހައްދަކުން އެންމެ ގަޑިއިރަށްވުރެ މަދު ވަގުތުކޮޅަކަށް ކަރަންޓު މެދުކަނޑާލައިގެން މި މަސައްކަތް ނިންމާލެވިފައިވެއެވެ.
އެކްސްގައި ހިއްސާކުރެއްވި ވީޑިއޯ މެސެޖެއްގައި ނާޝިދު ވަނީ އިތުރު މަޢުލޫމާތު ހާމަކުރައްވާފައެވެ. އެގޮތުން، ފޭސް 2 ގައި ޤާއިމުކުރެވިފައިވާ 11 ކިލޯވޯޓުގެ ނެޓްވޯކް ކޭބަލްތައް މިއަހަރުތެރޭ ސަބްސްޓޭޝަނަށް ބަދަލުކުރެވޭނެ ކަމަށާއި، މިކަމާ ގުޅޭ އިތުރު މަޢުލޫމާތު ވާންޖެހޭ ތައްޔާރީތައް ފުރިހަމަވުމުން ކަސްޓަމަރުންނާ ހިއްސާކުރަމުން ގެންދާނެ ކަމަށް ވިދާޅުވިއެވެ.
ސްޓެލްކޯގެ ޚިދުމަތް އިތުރަށް ފުޅާކޮށް ފުރިހަމަކުރުމަށް ކުރެވޭ މިފަދަ މަސައްކަތްތަކުގައި ކަސްޓަމަރުންގެ ފަރާތުން ލިބެމުންދާ އެއްބާރުލުމަށް ނާޝިދު ވަނީ ޝުކުރު އަދާކުރައްވާފައެވެ. މި މަސައްކަތް ނިމުމާއެކު، ހުޅުމާލޭގެ ދެވަނަ ފިޔަވަހީގެ ކަރަންޓުގެ ޚިދުމަތް އިތުރަށް ހަރުދަނާވެ، އިތުބާރު ބޮޑުވެގެންދާނެ ކަމަށާއި، މުޅި ގްރޭޓަރ މާލެ ސަރަހައްދުގެ ކަރަންޓުގެ ވިއުގަ އިތުރަށް ވަރުގަދަވެގެންދާނެ ކަމަށް ބެލެވެއެވެ.
