ފުލުހުންގެ އެކޮނޮމިކް ކްރައިމް ޑިޕާޓްމަންޓުގެ ވެރިޔާ، ސުޕްރިންޓެންޑެންޓް އޮފް ޕޮލިސް ރަޖުނީ ޝުއައިބު އެއްވެސް އުސޫލާ ހިލާފު ގޮތަކަށް ވިނަރެސް ފްލެޓެއް ހޯދާފައި ނުވާކަމަށް ފުލުހުން ވަނީ ހާމަކޮށްފައެވެ. މި މައްސަލައިގައި ކަމާބެހޭ އިދާރާތަކުން ހިއްސާކޮށްފައިވާ މައުލޫމާތު ދިރާސާކޮށް ބެލިބެލުމުން އެފަދަ އެއްވެސް ކަމެއް ފާހަގަކުރެވިފައި ނުވާކަމަށް ފުލުހުން އެކްސްގައި ކުރި ޕޯސްޓެއްގައި ބުނެފައިވެއެވެ.
މި މައްސަލަ މަތުވެރިވެފައިވަނީ ފުލުހުން އިސްވެ ތަހުގީގުކުރަމުންދާ "ބިންވެރިޔާ ސްކީމް"ގެ ބޭރުން ގޯތި ދޫކުރި މައްސަލައިގައި ފުލުހުން ބޭއްވި ނޫސްވެރިންގެ ބައްދަލުވުމަށް ފަހުއެވެ. އެ ބައްދަލުވުމަށްފަހު ސޯޝަލް މީޑިއާގައި ރަޖުނީއާ ދެކޮޅަށް އެކި ތުހުމަތުތައް ކުރަން ފަށާފައިވެއެވެ. މީގެ ތެރޭގައި "ހަސަންކުރުސީ" ނަމަކަށް ކިޔާ އެކްސް އެކައުންޓަކުން ރަޖުނީ ވިނަރެސް ފްލެޓެއް ގަތްކަމަށް ތުހުމަތުކޮށްފައިވެއެވެ.
އަދި މީގެ އިތުރުން ރަޖުނީ ވަނީ ހުޅުމާލޭގައި ހުންނަ ޕޮލްކޯ ފްލެޓްތަކުގެ ތެރެއިން ވެސް ފްލެޓެއް ހޯދާފައިވާކަން އެނގިފައިވެއެވެ. ތިން މިލިއަނެއްހާ ރުފިޔާއަށް ފްލެޓް ގަތުމަށް ބޭނުންކުރި ފައިސާ ހޯދި ގޮތާމެދު އާންމުން ދަނީ ސުވާލު އުފައްދަމުންނެވެ.
ކުރީގެ ސަރުކާރުގެ "ބިންވެރިޔާ ސްކީމް"ގެ ދަށުން ގޯތި ދޫކުރުމުގައި ހިނގާފައިވާ ކަމަށް ތުހުމަތުކުރެވޭ ކޮރަޕްޝަންގެ މައްސަލަ މިހާރު ދަނީ ފުލުހުންނާއި އެންޓި-ކޮރަޕްޝަން ކޮމިޝަން (އޭސީސީ) އިން ތަހުގީގުކުރަމުންނެވެ.
