ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ހުވަދުއަތޮޅަށް ކުރައްވަމުންދާ ދަތުރުފުޅުގެ ތެރެއިން ކަނޑުހުޅުދޫއަށް ވަޑައިގެން، އެރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން، ރާއްޖޭގެ ސީ އެމްބިއުލާންސް ޚިދުމަތް ހަރުދަނާކުރެއްވުމަށް މަސައްކަތް ކުރައްވާނެކަމުގެ ޔަގީންކަން ދެއްވައިފިއެވެ.
ރައީސް ފާހަގަކުރެއްވި ގޮތުގައި ކަނޑުހުޅުދޫ އެކަނި ނޫން، ރާއްޖޭގެ ހުރިހާ ރަށެއްގައިވެސް ސީ އެމްބިއުލާންސްގެ ޚިދުމަތް ރަނގަޅުކުރަން ޖެހިފައިވާކަން ފާހަގަކުރެއްވިއެވެ. އެމަނިކުފާނު ވިދާޅުވިގޮތުގައި މާލެ ވަޑައިގަތުމަށްފަހު ކަމާބެހޭ ފަރާތްތަކާ އެކު މިކަމާ ގުޅޭގޮތުން މަޝްވަރާކުރައްވާނެއެވެ.
މިވަގުތު ސީ އެމްބިއުލާންސްގެ ޚިދުމަތް ފޯރުކޮށްދެނީ އެމްއެންޑީއެފުން ކަމަށްވީނަމަވެސް، މި ޚިދުމަތް ލިބުމުގައި ދިމާވާ ދަތިތަކާ ގުޅޭގޮތުން ރައްޔިތުން ޝަކުވާ ކުރަމުންދެއެވެ. ޚާއްޞަކޮށް ބައެއް އަތޮޅުތަކުގައި ސީ އެމްބިއުލާންސް މަދުވުމާއި ޚިދުމަތް ލިބުމުގައި ލަސްވާކަމުގެ ޝަކުވާ އާންމުކޮށް އިވެއެވެ. މި ސަރުކާރުން ވަނީ މި ޚިދުމަތް ފުޅާކުރުމުގެ ގޮތުން މޯލްޑިވިއަންގެ ފްލީޓަށް ސީޕްލޭން އެމްބިއުލާންސްތަކެއް އިތުރުކޮށް، އެ ޚިދުމަތް ދޭން ފަށާފައެވެ.
ކަނޑުހުޅުދޫގެ ސިއްހީ މަރުކަޒާ ގުޅޭގޮތުންވެސް ރައީސް ވަނީ މުހިންމު އިޢުލާނެއް ކުރައްވާފައެވެ. އެގޮތުން އެ މަރުކަޒުން 24 ގަޑިއިރު ޚިދުމަތް ދެވޭނެ ފެންވަރަށް ތަރައްގީކޮށްދެއްވާނެ ކަމަށާއި، ސިއްހީ މަރުކަޒުން އެދިފައިވާ އެހެނިހެން ކަންކަމަށްވެސް މި އަހަރުގެ ތެރޭގައި ހައްލު ހޯއްދަވައިދެއްވާނެ ކަމަށް ވިދާޅުވިއެވެ. މި އަހަރަކީ ގިނަ މައްސަލަތަކަކަށް ދާއިމީ ހައްލެއް ގެނެސްދޭނެ އަހަރެއްގެ ގޮތުގައި ރައީސް ސިފަކުރެއްވިއެވެ.
