ބޭންކް އޮފް މޯލްޑިވްސްއިން މިއަދު ނެރުނު ނޫސްބަޔާނެއްގައި، އެ ބޭންކުގެ އޭޓީއެމްތަކުން ކްރިޕްޓޯ އެކްސްޗޭންޖް ކުރެވޭކަމަށް ދައްކުވައިދޭ ވީޑިއޯއެއް ސޯޝަލް މީޑިއާގައި ޝާއިޢުކޮށްފައިވާތީ އެކަމާމެދު ކަންބޮޑުވުން ފާޅުކޮށްފިއެވެ.
މި މައްސަލައިގައި ބޭންކުން ސާފުކޮށްދީފައިވަނީ އެ ބޭންކުގެ އެއްވެސް ޚިދުމަތެއް މެދުވެރިކޮށް ކްރިޕްޓޯ އެކްސްޗޭންޖްގެ މުޢާމަލާތްތަކެއް ނުހިންގޭނެ ކަމަށެވެ. ބޭންކުގެ އޭޓީއެމްތަކުން ކުރެވޭނީ ހަމައެކަނި އެމެރިކަން އެކްސްޕްރެސް، ވިސާ، މާސްޓަރކާޑު އަދި އެހެނިހެން ބައިނަލްއަޤްވާމީ ކާޑުތަކުން ކަނޑައެޅިފައިވާ ލިމިޓްގެ ތެރެއިން މުޢާމަލާތްތަކެވެ. ވީޑިއޯގައި ދައްކުވައިދޭ ފަދައިން އެއްވެސް ކާޑަކުން 100،000 އެމެރިކާ ޑޮލަރަށްވާ ދިވެހި ފައިސާ އެއްފަހަރާ ނެގުމަކީ ނުކުރެވޭނެ ކަމެއްކަން ބޭންކުން ފާހަގަކޮށްފައިވެއެވެ.
ބޭންކުގެ އޭޓީއެމް އަދި ލޯގޯ ބޭނުންކޮށްގެން، ކަސްޓަމަރުންނާއި އާންމު ރައްޔިތުންނަށް އޮޅޭގޮތަށް މިފަދަ ވީޑިއޯއެއް ޝާއިޢުކޮށްފައިވާތީ، އެކަން ބޭންކުން ވަނީ ހަރުކަށި ޢިބާރާތުން ކުށްވެރިކޮށްފައެވެ. މި ވީޑިއޯއާ ގުޅިގެން ގިނަ ކަސްޓަމަރުންތަކެއް ބޭންކަށް ގުޅައި މި ޚިދުމަތާ ގުޅޭގޮތުން ސުވާލުކުރަމުންދާކަންވެސް ބޭންކުގެ ނޫސްބަޔާނުގައި ފާހަގަކޮށްފައިވެއެވެ.
