ވ. އަތޮޅުގެ ޓޫރިޒަމްގެ މުހިންމު ހަޒާނާއެއްގެ ގޮތުގައި ބެލެވޭ ވާވު ޝިޕްރެކް، ރާއްޖެއަށް މިފަހުން ކުރި ގަދަ ވިއްސާރައިގައި ބޮޑުތަނުން ހަލާކުވެއްޖެއެވެ. ވ. ކެޔޮދޫ ބޭރުގައި އޮންނަ މި ޝިޕްރެކަކީ، އެ އަތޮޅު ކައުންސިލްގެ ބެލުމުގެ ދަށުގައިވާ، އަދި މާލެ އަތޮޅުންވެސް ދުވާލެއްގެ މައްޗަށް 10 ވަރަކަށް ލޯންޗު ޒިޔާރަތްކުރާ މަޤްބޫލު ތަނެކެވެ. މީގެ އިތުރުން ކައިރީގައިވާ ރިސޯޓުތަކުން މި ޝިޕްރެކަށް ޚާއްސަ ޕެކޭޖްތައް ވިއްކަމުންދެއެވެ.
ހެވަނަ މޯލްޑިވްސް ގެސްޓްހައުސްގެ ފަރާތުން ހާމަކޮށްފައިވާ ގޮތުގައި، މިހާތަނަށް އިންޖީނުގެ ބަރުދަނުގެ ސަބަބުން ފެންމަތީގައި އޮތް މި ބޯޓު، މިހާރު ވަނީ އިންޖީނު ވަކިވެ، މަޑޫތައް ފީވެ، މަތީ ބައި ބަންޑުން ޖަހާލާފައެވެ. އެފަރާތުން އާންމުކުރި ވީޑިއޯއިން މި ގެއްލުންތައް ސާފުކޮށް ފެންނަން ހުރުމާއެކު، ގިނަ ބަޔަކު ވަނީ އެކަމާ ހިތާމަކޮށްފައެވެ.
މި ޝިޕްރެކްގެ ތާރީޚަށް ބަލާއިރު، މިއީ އިންޑޮނޭޝިއާގެ ބޯޓެއް ކަމަށްވާއިރު، މީގެ 10 އަހަރު ކުރިން ވ. އަލިމަތާ ރިސޯޓާއި ފެލިދޫ ދިމާލުގައިވާ މަޑިއްޕަރު ހަލުން ފެނުނު އިރު، އެރަށުގެ ދެ މަސްވެރިއަކު ވަނީ އެ ބޯޓު ސަލާމަތްކުރަން މަސައްކަތްކޮށްފައެވެ. ނަމަވެސް އެ މަސައްކަތް ކާމިޔާބުނުވެ، ބޯޓު އޮޔާދިޔައީ ކެޔޮދޫ ބޭރަށެވެ. އޭގެފަހުން އެ ސަރަހައްދުގެ ގެސްޓްހައުސްތަކުގެ ޑައިވަރުން ވަނީ މި ބޯޓުގައި މުރަކަ އިންދައި، ޓޫރިސްޓުންނަށް ޒިޔާރަތްކުރެވޭ ހިތްގައިމު ތަނަކަށް ބަދަލުކޮށްފައެވެ.
މިހާރު ވ. އަތޮޅު ކައުންސިލާއި އެ އަތޮޅުގެ ބައެއް ގެސްޓްހައުސްތައް ގުޅިގެން އަންނަނީ މި ޝިޕްރެކް ސަލާމަތްކުރުމުގެ މަސައްކަތް ކުރަމުންނެވެ. މި ޝިޕްރެކަކީ އެކި އަތޮޅުތަކާއި ރިސޯޓުތަކުން ބޭނުންކުރާ ތަނަކަށްވުމާއެކު، މި ތަން އެއްކޮށް ހަލާކުވެއްޖެނަމަ، އެއީ ރާއްޖޭގެ ޓޫރިޒަމަށްވެސް ލިބިގެންދާނެ ބޮޑު ގެއްލުމެކެވެ.
