ތިނަދޫ ކައުންސިލުން ސިޓީ ކައުންސިލެއްގެ ދަރަޖަ ނުލިބެނީސް އެ ދަރަޖައިގެ މުސާރަ ނެގިކަމުގެ މައްސަލައެއް ކުރީގެ އެންވަޔަރަމަންޓް މިނިސްޓްރީގެ ޑެޕިއުޓީ މިނިސްޓަރު އަދި ޤާނޫނީ ވަކީލު އަހުމަދު ރާގިބް، އެންޓި ކޮރަޕްޝަން ކޮމިޝަނަށް ހުށަހަޅުއްވާފިއެވެ.
ރާގިބް މި މައްސަލަ އެންމެ ފުރަތަމަ ހުށަހެޅުއްވީ ލޯކަލް ގަވަރމަންޓް އޮތޯރިޓީއަށެވެ. އޭނާގެ މައްސަލައިގައި ބަޔާންކޮށްފައިވަނީ ތިނަދޫ ކައުންސިލްގެ ރައީސާއި މެންބަރުން، ސިޓީ ކައުންސިލެއް އުފެދުމުގެ ކުރިން މޭޔަރާއި ސިޓީ ކައުންސިލް މެންބަރުންގެ މުސާރަ ނަގާފައިވާކަމަށެވެ. މިއީ ޤާނޫނާ ޚިލާފަށް ދައުލަތުގެ މަޤާމު ނަހަމަ ގޮތުގައި ބޭނުންކޮށް، މާލީ މަންފާއެއް ހޯދުމުގެ ޢަމަލެއްކަމަށް ރާގިބް ފާހަގަކުރެއްވިއެވެ.
އެލްޖީއޭއިން މި މައްސަލައަށް ދިން ޖަވާބުގައި ބުނެފައިވަނީ، މި މައްސަލައިގައި ހިމެނޭ ކަންކަމަކީ ފުލުހުންނާއި އޭސީސީގެ މެންޑޭޓުގެ ތެރޭގައި ހިމެނޭ ކަންކަން ކަމަށެވެ. އެހެންކަމުން، ޖިނާއީ މައްސަލަތައް ފުލުހުންނަށް އަދި ޚިޔާނާތުގެ މައްސަލަތައް އޭސީސީއަށް ހުށަހެޅުމަށް ލަފާދީފައިވެއެވެ. އަދި އެ ދެ މުއައްސަސާއިން މައްސަލަ ބެލުމަށްފަހު، އިދާރީ ގޮތުން އަޅަންޖެހޭ ފިޔަވަޅެއް ފާހަގަކުރެވިއްޖެނަމަ، އެލްޖީއޭއިން އެކަން ބަލާނެކަމަށްވެސް އަންގާފައިވެއެވެ.
"ދިޔަރެސް" އާ ވާހަކަދައްކަވަމުން ރާގިބް ވިދާޅުވީ، މައްސަލަ މިހާރު އޭސީސީއަށް ހުށަހަޅާފައިވާ ކަމަށާއި، އެ ކޮމިޝަނުން މައްސަލަ ބަލައިގަތްކަން އަންގާފައިވާ ކަމަށެވެ.
މީގެ ކުރިން، ތިނަދޫއަށް ސިޓީއެއްގެ ދަރަޖަ ދީފައިވަނީ ޤާނޫނުގައި ބަޔާންކުރާ 10،000 މީހުންގެ އާބާދީ ހަމަނުވަނީސް، އޮޅުވާލައިގެން ކަމަށް ބުނެ ރާގިބް ވަނީ ހައިކޯޓަށް ދުސްތޫރީ މައްސަލައެއް ހުށަހަޅުއްވާފައެވެ. ނަމަވެސް ކޯޓުން އެ މައްސަލަ ވަނީ ބޭރުކޮށްލާފައެވެ. އެލްޖީއޭއަށް ފޮނުވި ސިޓީގައި ރާގިބް ވަނީ ތިނަދޫ ކައުންސިލުން ހުށަހެޅި އާބާދީގެ ލިސްޓުގައި އާބާދީ ތަކުރާރުވެފައިވާ ކަމަށާއި، އައިޑީކާޑު ބަދަލުކޮށްފައިވާ ކަމަށާއި، މަރުވެފައިވާ މީހުންނާއި ތިނަދޫ ނޫން އެހެން ރަށްރަށުގެ މީހުންގެ ރަޖިސްޓްރީ ހިމަނާފައިވާކަންވެސް ފާހަގަކުރައްވާފައެވެ.
