އެމްޓީސީސީއިން އެ ކުންފުނީގެ މަޝްރޫއުތަކުގެ މަޢުލޫމާތު ހާމަކަން ބޮޑު ގޮތެއްގައި ޢާންމުންނާ ހިއްސާކުރުމަށްޓަކައި އައު އޮންލައިން ޕްލެޓްފޯމެއް ތަޢާރަފުކޮށްފިއެވެ. އެ ކުންފުނީގެ ވެބްސައިޓަށް އިތުރުކުރެވުނު "ޕްރޮޖެކްޓް ޕޭޖް" އިން މުޅި ރާއްޖޭގައި ހިންގާ އެންމެހައި މަޝްރޫއުތަކުގެ ތަފްސީލީ މަޢުލޫމާތު ލިބެން ހުންނާނެއެވެ.
މި އައު ސިސްޓަމްގެ ދަށުން، އަތޮޅުތަކާއި ރަށްރަށުގައި ހިންގާ ވަކިވަކި މަޝްރޫއުތަކުގެ މަޢުލޫމާތާއި، މަޝްރޫއުތަކުގެ ބާވަތް، އަދި އޭގެ ކުރިއެރުން ފަސޭހައިން ބެލޭނެއެވެ. މީގެ އިތުރުން، މަޝްރޫއުތަކުގެ އަގާއި، ފެށިފައިވާ، ހިނގަމުންދާ އަދި ހުއްޓިފައިވާ މަޝްރޫއުތަކުގެ މަޢުލޫމާތުވެސް ހިމެނެއެވެ. މި މަޢުލޫމާތުތައް ކޮންމެ ދުވަހަކު އޮޓޮމެޓިކުން އަޕްޑޭޓްވާ ޕްރޮޖެކްޓް މެނޭޖްމަންޓް ސޮފްޓްވެއަރއެއް މެދުވެރިކޮށް ބަލަހައްޓަމުން ގެންދެއެވެ.
މިދިޔަ އަހަރުގެ ތިންވަނަ ކުއާޓަރގެ ނިޔަލަށް އެމްޓީސީސީއިން ޖުމުލަ 191 މަޝްރޫއެއްގެ މަސައްކަތް ކުރިއަށް ގެންގޮސްފައިވެއެވެ. މި މަޝްރޫއުތަކުގެ ތެރޭގައި ފަސް އެއަރޕޯޓް، 14 އިމާރާތް، ހަ ކޯޒްވޭ ބްރިޖް، 75 ބަނދަރު، އެއް ޓާމިނަލް، ދެ ޖެޓީ، 35 ބޮޑުހިލަ ޖެހުމުގެ މަޝްރޫއު، ފަސް ކޮންސަލްޓަންސީ މަސައްކަތް، ހަތް މަގު، އެއް ފުޓްސަލް ދަނޑު އަދި އެހެނިހެން ނުވަ މަޝްރޫއު ހިމެނެއެވެ.
އެ ކުއާޓަރގައި އަށް މަޝްރޫއެއް ނިންމާލެވުނު އިރު، އޭގެ ޖުމުލަ އަގަކީ 443 މިލިއަން ރުފިޔާއެވެ. އަދި 202 މިލިއަން ރުފިޔާގެ އައު މަޝްރޫއުތަކެއް ސަރުކާރުން ވަނީ އެމްޓީސީސީއާ ހަވާލުކޮށްފައެވެ. ތިންވަނަ ކުއާޓަރގައި ކުންފުންޏަށް 587.05 މިލިއަން ރުފިޔާގެ އާމްދަނީ ލިބިފައިވެއެވެ. މިއީ ދެވަނަ ކުއާޓަރގައި ލިބުނު 497.41 މިލިއަން ރުފިޔާއަށްވުރެ އިތުރު އަދަދެކެވެ. ނަމަވެސް، ސާފު ފައިދާ ވަނީ 18.11 މިލިއަން ރުފިޔާއިން ދަށްވެފައެވެ.
