މަސްދޯނިފަހަރުގައި އާރުއެސްޑަބްލިއު (ލޮނުފެނުން މަސް ފިނިކުރާ) ނިޒާމު ގާއިމްކުރުމަށް އަލުން ލޯނު ދޫކުރުމުގެ ފުރުސަތު ހުޅުވާލައިފިއެވެ. މިއީ މީގެ ކުރިން މިދިޔަ ސެޕްޓެމްބަރު މަހު ވެސް ހުޅުވާލި ފުރުސަތެއް ކަމަށްވާއިރު، އޭރު 39 ފަރާތަކުން ލޯނަށް އެދި ހުށަހެޅި ކަމަށް ފިޝަރީޒް މިނިސްޓްރީން ވަނީ ހާމަކޮށްފައެވެ.
މި ލޯނަކީ އެސްޑީއެފްސީ މެދުވެރިކޮށް ރަހުނެއް ނެތި ދޫކުރާ ލޯނެއް ކަމަށްވާއިރު، މީގެ ދަށުން 100,000 ރުފިޔާއިން ފެށިގެން 2,000,000 ރުފިޔާއާ ހަމައަށް ލޯނު ނެގުމުގެ ފުރުސަތު ލިބިގެންދާނެއެވެ. އަދި މީގެ ކުރިން ހުޅުވާލި ފުރުސަތުތަކާ ތަފާތުކޮށް، އަލަށް ހުޅުވާލި ފެސިލިޓީގެ ދަށުން ދޯނިތަކުގައި އިރުގެ އަވިން ހަކަތަ އުފެއްދޭ ސޯލާ ނިޒާމާއި ޖެނެރޭޓަރު ހޯދުމަށްވެސް ފުރުސަތު ލިބޭނެއެވެ.
މި ލޯނު އަނބުރާ ދެއްކުމަށް 10 އަހަރުގެ މުއްދަތެއް ދެވޭއިރު، އޭގެ ތެރެއިން ފުރަތަމަ ހަ މަސް ދުވަހަކީ ގްރޭސް ޕީރިއަޑެއްގެ ގޮތުގައި ކަނޑައަޅާފައިވާ މުއްދަތެކެވެ.
