ރައީސް ޑރ. މުހައްމަދު މުއިއްޒު މިހާރު ހުވަދުއަތޮޅަށް ކުރައްވަމުން ގެންދަވާ ދަތުރުފުޅުގައި އައު އުސޫލެއް ތަޢާރަފު ކުރައްވައިފިއެވެ. އެގޮތުން ރަށްރަށުގެ ރައްޔިތުންނާ ބައްދަލުކުރައްވާއިރު، ކުރީ ގޮނޑި ބަރިތައް އެ ރަށްރަށުގެ ޚިދުމަތްތެރިންނަށް ޚާއްޞަ ކުރެއްވުމަށް ނިންމަވާފައިވެއެވެ.
މީގެ ކުރިން ރައީސުން ރަށްރަށުގެ ރައްޔިތުންނާ ބައްދަލުކުރައްވާއިރު އެންމެ ކުރީ ސަފުގައި ތިއްބަވަނީ ދައުލަތުގެ އިސްވެރިންނާއި އެ ރަށެއްގެ މިހާރުގެ ވެރިންނެވެ. ނަމަވެސް ރައީސް އޮފީހުން ބުނީ، ކުރީ ސަފުން ޚިދުމަތްތެރިންނަށް ފުރުސަތު ދެއްވަން ރައީސް ނިންމެވީ އެ ބޭފުޅުން ރަށްރަށަށް ކޮށްދެއްވި ޚިދުމަތް އަގުވަޒަންކުރެއްވުމުގެ ގޮތުންނެވެ. އެ ބޭބޭފުޅުންނަކީ ރަށްރަށުގެ ތަރައްގީގެ ފަހަތުގައި ތިއްބެވި ޚިދުމަތްތެރިން ކަމަށް ރައީސް ގަބޫލުފުޅުކުރައްވާ ކަމަށާއި، އެހެންވެ އެ ބޭފުޅުންނާ މަޝްވަރާކުރަން ރައީސް މުއިއްޒު ބޭނުންފުޅުވާ ކަމަށްވެސް ރައީސް އޮފީހުން ހާމަކުރިއެވެ.
މިހާތަނަށް ރައީސްގެ އަރިހުގައި ފެނިވަޑައިގެންނެވި ޚިދުމަތްތެރިންގެ ތެރޭގައި ގދ. ފިޔޯރީގެ ކުރީގެ ކަތީބު އަދި ސްކޫލު ހެޑްމާސްޓަރު މުހައްމަދު ސައީދު، ކުރީގެ ކުޑަ ކަތީބު އަހުމަދު ދީދީ، އަދި ކުރީގެ އަތޮޅުވެރިޔާގެ އެހީތެރިޔާ އަލީ ފަހުމީ ހިމެނިވަޑައިގަންނަވައެވެ. އަދި ގދ. ވާދޫން 35 އަހަރު ވަންދެން ކެޔޮޅުކަން ކުރެއްވި ޖަލީލް، ކުރީގެ ކަތީބު މުހައްމަދު އަލީ، އަދި 36 އަހަރު ވަންދެން ދިފާޢީ ބާރުގައި ޚިދުމަތްކުރެއްވި މުހައްމަދު އަލީ ހިމެނެއެވެ. ރަތަފަންދޫން ގިނަ ދުވަސްވީ އަދި މިހާރުވެސް ޚިދުމަތް ކުރައްވަމުންދާ މުދިމު އަބްދުލް ރަޝީދު އަދި ރަށުގެ ގަދަރުވެރި ވިޔަފާރިވެރިއެއް ކަމުގައިވާ އަލީ އިބްރާހިމްވެސް ހިމެނިވަޑައިގަންނަވައެވެ.
ތިން ދުވަހުގެ މުއްދަތަށް ކުރައްވާ މި ދަތުރުފުޅުގައި ހުވަދުއަތޮޅު ދެކުނުބުރީގެ ފަސް ރަށަކަށާއި، ހުވަދުއަތޮޅު އުތުރުބުރީގެ ހަތަރު ރަށަކަށް ރައީސް ވަޑައިގެންނެވުމަށް ވަނީ ހަމަޖެހިފައެވެ. އެގޮތުން، ހުވަދުއަތޮޅު ދެކުނުބުރިން އިއްޔެ ހޯނޑެއްދޫ، ނަޑެއްލާ، ވާދޫ އަދި ފިޔޯރީއަށް ވަޑައިގެންނެވިއެވެ. އަދި ހުވަދުއަތޮޅު އުތުރުބުރީން ކަނޑުހުޅުދޫ، ނިލަންދޫ، މާމެންދޫ އަދި ދެއްވަދޫއަށް ވަޑައިގެންނެވުމަށް ވަނީ ހަމަޖެހިފައެވެ.
ވަޒީރުންނާއި ސަރުކާރުގެ ބައެއް އިސްވެރިން ބައިވެރިވެވަޑައިގަންނަވާ މި ދަތުރުފުޅު ނިންމަވާލައްވައި، މާލެ ވަޑައިގެންނެވުމަށް ހަމަޖެހިފައިވަނީ މާދަމާއެވެ.
