ފުލުހުން މިރޭ ދަންވަރު ކޯޓު އަމުރެއްގެ ދަށުން އާރްޑީސީގެ ކުރީގެ މެނޭޖިން ޑިރެކްޓަރު މޫސާ އަލި މަނިކު (މޫކޭ) ގެ ގޭގައި ބަލައި ފާސްކުރުމުގެ މަސައްކަތް ކުރިއަށް ގެންގޮސްފިއެވެ. މި މަސައްކަތް ކުރިއަށްދިޔައީ ލޮނުޒިޔާރަތް މަގުގައި ހުންނަ ގ. ދިލްކަޝްގޭގެ 8 ވަނަ ފަންގިފިލާގައެވެ.
ކްރިމިނަލް ކޯޓުގެ އިސް ގާޒީ، އާދަމް މުހައްމަދު ސޮއިކުރައްވާފައިވާ ކޯޓު އަމުރުގައި ވާގޮތުން، އާރްޑީސީގެ އެމްޑީގެ މަގާމުގައި ހުންނެވިއިރު މޫކޭ ވަނީ ކުންފުނީގެ ފައިސާއަށް ހިޔާނާތްތެރިވެ، އެ ފައިސާ ލޯންޑާކޮށް، އަމިއްލަ މަންފާ ހޯއްދަވާފައިކަމަށް ފުލުހުން ތުހުމަތުކުރެއެވެ. މި މައްސަލައިގެ ތަހުގީގަށްޓަކައި މޫކޭގެ ހަށިގަނޑާއި، އޭނާ ބޭނުންކުރައްވާ މޯބައިލް ފޯނުތަކާއި، އިލެކްޓްރޯނިކް ޑިވައިސްތަކާއި، ސިމްކާޑުތަކާއި އަދި ހެކި ގަރީނާގެ ގޮތުގައި ބެލެވޭ އެހެނިހެން ތަކެތި ފުލުހުންގެ ބެލުމުގެ ދަށަށް ގެންދިއުމުގެ ހުއްދަ ކޯޓު އަމުރުގައި ދީފައިވެއެވެ.
ފުލުހުން މި ކޯޓު އަމުރު ނެރުމަށް ހުށަހެޅި ހެއްކާއި ގަރީނާގެ ތެރޭގައި ހިމެނެނީ ފުލުހުންގެ ހިދުމަތުގެ އިންޓެލިޖެންސް ރިޕޯޓެކެވެ. އަދި ބަލައިފާސްކުރުމުގެ މަސައްކަތަށް ދީފައިވަނީ މަސައްކަތް ފަށާ ވަގުތުން ފެށިގެން ހަތަރު ގަޑިއިރުގެ މުއްދަތެކެވެ. މި މައްސަލައިގައި މޫކޭގެ މައްޗަށް ތުހުމަތުކުރެވޭ މަނީ ލޯންޑަރިންގގެ ކުށަށް ފުލުހުން ހަވާލާދީފައިވަނީ ގާނޫނުލް އުގޫބާތާއި މަނީ ލޯންޑަރިން އަދި ޓެރަރިޒަމަށް ފައިނޭންސް ކުރުން ހުއްޓުވުމުގެ ގާނޫނަށެވެ.
