މޯލްޑިވްސް ޒަކާތު ހައުސްގެ މާލީ އެހީތެރިކަމާއެކު ފަލަސްތީނުގެ ރައްޔިތުންނަށް ފެނުގެ އެހީތެރިކަން ފޯރުކޮށްދީފިއެވެ.
ގަތަރު ރެޑް ކްރެސެންޓުން މަޢުލޫމާތު ދެއްވި ގޮތުގައި، މި އެހީގެ ދަށުން އަލް ޝިފާ އަދި އަލް ހަޔާތު ހޮސްޕިޓަލުގައި ފަރުވާ ހޯދަމުންދާ ބަލިމީހުންނާއި ޒަހަމްވެފައިވާ މީހުންނަށް މިހާތަނަށް 6،000 ކޭސް ފެން ފޯރުކޮށްދެވިފައިވެއެވެ. އަދި ރާއްޖޭގެ ޒަކާތު ފަންޑުގެ އެހީގެ ދަށުން ޖުމްލަ 50،000 ކޭސް ފެން ބެހުމަށް ވަނީ ހަމަޖެހިފައެވެ.
މި އެހީތެރިކަމަކީ މިދިޔަ މަހުގެ 27 ވަނަ ދުވަހު ސޮއިކުރެވުނު އެއްބަސްވުމެއްގެ ދަށުން، ފަލަސްތީނުގެ ރައްޔިތުންނަށް ރާއްޖޭގެ ޒަކާތު ފަންޑުން ހަދިޔާކުރި އެއްލައްކަ ޑޮލަރުގެ އެހީގެ ބައެކެވެ. އޮންލައިންކޮށް ބޭއްވުނު މި އެއްބަސްވުމުގެ ރަސްމިއްޔާތުގައި އިސްލާމިކް މިނިސްޓްރީގެ ފަރާތުން ސޮއިކުރެއްވީ މިނިސްޓަރު ޑރ. މުހައްމަދު ޝަހީމް އަލީ ސައީދެވެ. އަދި ފައިސާ އާ ހަވާލުވާ ފަރާތްކަމުގައިވާ ގަތަރު ރެޑްކްރެސެންޓް ސޮސައިޓީގެ ފަރާތުން ސޮއިކުރެއްވީ އެތަނުގެ ސެކްރެޓަރީ ޖެނެރަލް ފައިސަލް މުހައްމަދު އަލްއެމަދީއެވެ.
