ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ވަނީ މޫސުން ގޯސްވުމާ ގުޅިގެން ކަނޑުދަތުރުފަތުރު ކުރާ ފަރާތްތަކަށް އިންޒާރުގެ ނޯޓިސް ނެރެފިއެވެ. މިހާރު މިވަނީ ވައިގަދަ އަދި ކަނޑުގަދަ ދުވަސްވަރެއް ކަމަށްވުމާއެކު، ރައްކާތެރިކަމުގެ ފިޔަވަޅުތައް އެޅުމަށް އެފަރާތުން ވަނީ އާންމުންނަށް އިލްތިމާސްކޮށްފައެވެ.
އެންޑީއެމްއޭ އިން ވަނީ ގަދަވައިގައި އެއްލާލަފާނެ ތަކެތި، ޚާއްޞަކޮށް ގޭގޭގެ ފުރާޅާއި ގަސްމުށިފަދަ ތަކެތި ރައްކާތެރިކޮށް ބަންދުކުރުމަށް އެދިފައެވެ. މީގެއިތުރުން ކަނޑުދަތުރުކުރާ ފަރާތްތަކުން މޫސުމަށް ސަމާލުކަންދީގެން ދަތުރުކުރުމަށްވެސް އިލްތިމާސްކޮށްފައިވެއެވެ. މޫސުން ގޯސްވުމާ ގުޅިގެން މޯލްޑިވްސް މީޓިއޮރޮލޮޖިކަލް ސަރވިސް އިން ވަނީ އައްޑޫ ސިޓީ އާއި ފުވައްމުލަކަށް މިރޭ 11 ޖެހުމާ ހަމައަށް ޔެލޯ އެލާޓެއް ނެރެފައެވެ.
މެޓް އޮފީހުގެ ލަފާގައި މިވަގުތު ގަޑިއަކު 25 އާއި 30 މޭލުގެ ބާރުމިނުގައި ވައި ޖެހޭނެކަމަށް ބުނެފައިވާއިރު، ކަނޑުތައްވެސް ގަދަވާނެކަމަށް ލަފާކޮށްފައިވެއެވެ. އަދި ކުރިއަށް އޮތް ހަފްތާ ބަންދުގައި ރާއްޖޭގެ ހުރިހާ ސަރަހައްދަކަށްވެސް މޫސުން ގޯސްވާނެކަމަށް ބެލެވޭކަމަށް ބުނެފައިވެއެވެ. ޚާއްޞަކޮށް ހުކުރު އަދި ހޮނިހިރު ދުވަހު އުތުރުގެ ރަށްތަކަށް ގުގުރުމާއެކު ވިއްސާރަވެ، އެހެން ސަރަހައްދުތަކަށް ގަދަ ވަޔާއެކު ވިއްސާރަވާނެކަމަށް ލަފާކުރެވެއެވެ.
މެޓް އޮފީހުން ފާހަގަކުރި ގޮތުގައި މިއީ ރާއްޖެއަށް ހުޅަނގު މޫސުން ނިމި، އިރުވައި މޫސުން ފެށޭ ދުވަސްވަރު ކަމަށްވުމާއެކު، މިފަދަ ދުވަސްވަރު ކޮޅިގަނޑު އުފެދުމުގެ ފުރުސަތު ބޮޑުކަމަށް ވަނީ ފާހަގަކޮށްފައެވެ.
ކޮމެންޓު ފޮނުވާ