ކުރީގެ ރައީސް އިބްރާހިމް މުހައްމަދު ސޯލިހްގެ ވެރިކަމުގައި ހިންގި ބިންވެރިޔާ އަދި ގެދޮރުވެރިޔާ ސްކީމާ ގުޅޭ ޖިނާއީ ތަހުގީގެއް ހިންގަން ޕްރޮސިކިއުޓާ ޖެނެރަލް (ޕީޖީ) އައްބާސް ޝަރީފް ފުލުހުންނަށާއި އެންޓި ކޮރަޕްޝަން ކޮމިޝަން (އޭސީސީ) އަށް އަމުރު ކުރައްވައިފިއެވެ.
ޕީޖީ އޮފީހުން ބުނީ ގެދޮރުވެރިޔާގެ ސްކީމްގެ ފޯމު ބަލައިގަތުމާއި ގޯއްޗާއި ފްލެޓް ލިބޭ މީހުން ކަނޑައެޅުމުގައި އަދި ގޯއްޗާއި ފްލެޓް ދޫކުރުމުގައި ކަނޑައެޅިފައިވާ އުސޫލުތަކާއި ގަވާއިދުތަކާ ހިލާފަށް އަމަލުކޮށްފައިވާ ކަމުގެ ޝަކުވާތައް ލިބިފައިވާ ކަމަށެވެ.
އަދި މި ކަމަކީ އާންމު މަސްލަހަތު މަތީ މިންވަރަކަށް އެކުލެވޭ ކަމަކަށްވާތީ މިކަމަކީ ފުރިހަމަ ޖިނާއީ ތަހުގީގެއް ހިންގަންޖެހޭ ކަމެއްކަމަށް ޕީޖީ ދެކެވަޑައިގަންނަވާ ކަަމަށްވެސް އެ އޮފީހުން ވަނީ ބުނެފައެވެ.
އެހެންކަމުން، ގާނޫނުއަސާސީގެ 223 ވަނަ މާއްދާގެ (ޅ) ގެ ދަށުން ޕްރޮސިކިއުޓާ ޖެނެރަލަށް ލިބޭ ބާރުގެ ދަށުން، "ބިންވެރިޔާ" އަދި "ގެދޮރުވެރިޔާ" އާ ގުޅޭ ތަހުގީގެއް ހިންގަން ޕީޖީ އަމުރުކުރެއްވިއެވެ. މިކަމުގައި އެއްވެސް މީހެއްގެ މައްޗަށް ޖިނާއީ ތުހުމަތެއް ކުރެވޭ ނަމަ އެކަން ތަހުގީގު ކުރުމަށް ފަހު، ދައުވާކުރަން ފޮނުވަން ވެސް އަމުރު ކުރެއްވިއެވެ.
މި މައްސަލައިގެ ތަހުގީގު ހިނގަމުންދާ ގޮތް، ކޮންމެ ހަފްތާއަކު 1 ފަހަރު ޕީޖީ އާއި ހިއްސާ ކުރަމުން ގެންދިއުމަށާއި، މި މައްސަލައިގެ އަވަސް ތަހުގީގެއް ހިންގުމަށް ޕީޖީ އަމުރުކުރައްވާފައި ވެއެވެ.
މާލޭގެ ރައްޔިތުންނަށް ފްލެޓް ދިނުމަށް ހިންގި ގެދޮރުވެރިޔާ ސްކީމާ ގުޅޭ ތަހުގީގެއް އޭސީސީން ހިންގިއެވެ. އެ ތަހުގީގަށް ފަހު އޭސީސީން ބުނެފައިވަނީ ފްލެޓު ލިސްޓުގައި ހިމެނޭ %60 މީހުންނަށް ފްލެޓު ހައްގު ނޫން ކަމަށެވެ. އަދި ފްލެޓު ހައްގުވަނީ %20 މީހުންނަށް ކަމަށް ވެސް އެ ތަހުގީގުގައި ބުނެފައިވެއެވެ. އެހެންވެ، އެ ލިސްޓް ރިވިއު ކުރަން އެ ކޮމިޝަނުން އަންގާފައިވާ އިރު، އެ މަސައްކަތް ސޯޝަލް ހައުސިން އާ ގުޅޭ ކޮމިޓީން ދަނީ ކުރަމުންނެވެ. ކުރީގެ ސަރުކާރުން ދޫކުރަން ނިންމި 4،000 ފްލެޓާ ގުޅޭ ތަހުގީގެއް ހިންގި އިރު، މާލޭ ރައްޔިތުންނަށް ގޯތި ދޫކުރި ބިންވެރިޔާ ސްކީމްއާ ގުޅޭ މައްސަލައެއް އޭސީސީން ބަލާފައެއް ނުވެއެވެ.
ބިންވެރިޔާ ސްކީމްގެ ގޯތީގެ މައްސަލަ މި ފާހަގަވީ އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދުގެ ބޭބެ މުހައްމަދު ފަޒީލް ރަޝީދުގެ ގޯއްޗަށް ޝަރުތު ހަމަނުވާ ކަމަށް ކަނޑައަޅާފައި އޮއްވައި އޭނާއަށް ގޯއްޗެއްގެ ހުއްދަ ދޫކޮށްފައިވާ މައްސަލައެއް ފެންމަތިވެފައި ވަނިކޮށެވެ. އެކަމަކު އޭނާ އަށް ގޯތި ލިބިފައިވާ ކަމަށް ބުނާ ރަޖިސްޓްރީއާ އެކު، އެ ބިމުގެ ވަށާފާރު ރޭނުމުގެ ހުއްދައަކަށް އެޗްޑީސީގައި އެދުނެވެ.
ފަޒީލް އެ ހުއްދަ އަށް އެދުނީ ޖޫން 30، 2024 ގައެވެ. އެޗްޑީސީން އަމަލުކުރާ އުސޫލުން އެ ގޯތީގެ ރެޖިސްޓްރީ ވެރިފައި ކުރުމަށް ހައުސިން މިނިސްޓްރީ އަށް ފޮނުވިއެވެ. ހައުސިން މިނިސްޓްރީން މި އަހަރުގެ އޯގަސްޓް 15 ގައި އެޗްޑީސީގެ ސިޓީއަށް ދިން ޖަވާބުގައި އޮތީ އެއީ ބިންވެރިޔާ ލިސްޓުގައި ހިމެނޭ ބައެއް ނޫން ކަމަށާއި އެ ދެ ގޯއްޗަކީ އެއްވެސް މީހަކަށް ދީފައި އޮތް ދެ ގޯތި ނޫން ކަމަށެވެ.
މ މައްސަލަ އެހެން އޮއްވައި ފަޒީލަށް ލިބުނު ގޯތީގެ ވަށައި ފާރު ވެސް ވަނީ ރާނައިފައެވެ.
މި މައްސަލަ ފެންމަތިވުމާ ގުޅިގެން ފުލުހުން ވަނީ ޖިނާއީ ތަހުގީގެއް ވެސް ފަށައިފައެވެ.ތަހުގީގާ ގުޅިގެން އެޗްޑީސީގެ މެނޭޖިން ޑިރެކްޓަރު ފަޒުލް އާއި ބޯޑު އެއްކޮށް މިއަދު ވަނީ ސަސްޕެންޑް ވެސް ކޮށްފައެވެ. އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރުކަން ކުރައްވާ ފަޒީލް ވެސް ވަނީ މަގާމުން ސަސްޕެންޑްކޮށްފައެވެ. އޭނާއާ ދެކޮޅަށް ފޯޖަރީގެ މައްސަލައެއް ފުލުހުން ދަނީ ތަހުގީގު ކުރަމުންނެވެ.
