ހިޔާ ފްލެޓުތަކުގައި އިތުރު ލިފްޓު ހަރުކުރުމުގެ މަސައްކަތުގެ އަގާ ގުޅޭގޮތުން އުފެދިފައިވާ ސުވާލުތަކަށް، މިހާރު ސަސްޕެންޑްކޮށްފައިވާ، އެޗްޑީސީގެ މެނޭޖިންގ ޑިރެކްޓަރު އިބްރާހިމް ފަޒުލް ރަޝީދު ރައްދު ދެއްވައިފިއެވެ. އޭނާ މިކަމަށް ރައްދު ދެއްވާފައިވަނީ އެކުންފުންޏަށް ކުރެވެމުންދާ ކޮރަޕްޝަންގެ ތުހުމަތުތަކާ ގުޅޭގޮތުން ރޭ ބޭއްވި ނޫސްވެރިންގެ ބައްދަލުވުމުގައެވެ.
އޭނާ ވިދާޅުވެފައިވަނީ، މި މަސައްކަތް ހަވާލުކުރެވިފައިވަނީ އެންމެ ކުޑަ އަގު ހުށަހެޅި ފަރާތަށް ކަމަށެވެ.
ރައީސް ޑރ. މުހައްމަދު މުއިއްޒުގެ ރިޔާސީ ވައުދެއްގެ ގޮތުގައި ހިމެނޭ މި މަޝްރޫޢުގެ ދަށުން، 16 ޓަވަރުގައި އިތުރު 32 ލިފްޓު ހަރުކުރުމަށް 18 މިލިއަން ޑޮލަރު (277 މިލިއަން ރުފިޔާ) ހޭދަވާނެ ކަމަށް ފަޒުލް ކުރިން ވިދާޅުވެފައިވެއެވެ. ކޮންމެ ޓަވަރެއްގައި ހަރުކުރެވޭ ދެ ލިފްޓުގެ ތެރެއިން އެއް ލިފްޓަކީ ސްޓްރެޗަރ އެރުވޭވަރުގެ ބޮޑު ލިފްޓެއް ކަމަށާއި، އަނެއް ލިފްޓަކީ 14 މީހުންގެ ކެޕޭސިޓީގެ ލިފްޓެއް ކަމަށް ވެއެވެ. މި މަޝްރޫޢަށް 2024 ވަނަ އަހަރުގެ ދައުލަތުގެ ބަޖެޓުގައި 200 މިލިއަން ރުފިޔާ ހިމަނާފައިވެއެވެ.
އެޗްޑީސީގައި ރޭ ބޭއްވުނު ނޫސްވެރިންގެ ބައްދަލުވުމުގައި ފަޒުލް ވިދާޅުވި ގޮތުގައި، މި މަސައްކަތަކީ ވަރަށް ބުރަ މަސައްކަތެކެވެ. ލިފްޓު ހަރުކުރުމުގެ ކުރިން ފައުންޑޭޝަން "ކަޓްކޮށް" ސްޓީލް ސްޓްރަކްޗަރ ގާއިމުކުރުން ފަދަ އިތުރު މަސައްކަތްތަކެއް ކުރަންޖެހޭ ކަމަށް އޭނާ ފާހަގަކުރެއްވިއެވެ. 10 ބުރީގެ އިމާރާތެއްގައި ލިފްޓެއް ބެހެއްޓުމުގެ އަގު އެކަނި 800,000 ރުފިޔާއާއި 1 މިލިއަން ރުފިޔާއާ ދެމެދުގައި ހުންނަ ކަމަށް ވިދާޅުވިއެވެ.
ޗައިނާގެ ޝެންޔަންގް ޔުއާން އިންޓެލެކްޗުއަލް ގްރޫޕާ ހަވާލުކުރެވިފައިވާ މި މަސައްކަތް މިހާރުވެސް ދަނީ ވަރަށް ހަލުވި ސްޕީޑެއްގައި ކުރިއަށް ކަމަށް ފަޒުލް ވިދާޅުވިއެވެ. އެޗްޑީސީން މި މަސައްކަތް އެއް އަހަރު ތެރޭގައި ނިންމުމަށް ލަފާކުރާއިރު، ރައީސް މުއިއްޒުގެ އަމާޒަކީ އެއަށްވުރެ ކުރިން މަސައްކަތް ނިންމުމެވެ. ކުރިން ހައުސިންގ މިނިސްޓަރުގެ މަގާމުގައި ހުންނެވިއިރު ރައީސް މުއިއްޒު ފެއްޓެވި ހިޔާ މަޝްރޫޢުގެ 25 ބުރީގެ 16 ޓަވަރުގައި މިހާރު ހަރުކުރެވިފައިވަނީ ޖުމްލަ 54 ލިފްޓެވެ.
