ޑިސެމްބަރު 13 ވަނަ ދުވަހުގެ ރޭ ގުރައިދޫގައި ނިޔާވު އުމުރުން އެންމެ ހަތަރު މަހުގެ ކުއްޖަކު ނިޔާވ މައްސަލަ އިތުރަށް ތަހުގީގު ކުރުމަށްޓަކައި، މިއަދު މެންދުރު 12:00 ގައި އެ ކުއްޖާގެ ހަށިގަނޑު ޕޯސްޓްމޯޓަމް ހެދުމަށް އިންޑިއާއަށް ފޮނުވައިފިއެވެ.
މި ހާދިސާ ފުރަތަމަ ފުލުހުންނަށް ރިޕޯޓުކުރެވުނީ ހާދިސާ ހިނގި ދުވަހުގެ ޖެހިގެން އައި ދުވަހުއެވެ. "ވަގުތު" އަށް ލިބިފައިވާ މައުލޫމާތުގެ މަތިން، އެ ކުއްޖާ ސިއްހީ މަރުކަޒަށް ގެންދެވުނީ ދަންވަރު 12 ގެ ފަހުންނެވެ. ސިއްހީ މަރުކަޒަށް ގެންދިޔައިރު ކުއްޖާ އޮތީ ނިޔާވެފައެވެ. އަދި ކުއްޖާގެ ނޭފަތުން ލޭ އައިސްފައި ހުރިކަން ފާހަގަކުރެވުނެވެ. ނަމަވެސް، މިއީ ކުއްޖާގެ ހަށިގަނޑުން ފެނުނު ހަމައެކަނި ޒަހަމެވެ.
އާއިލާއިން ބުނާގޮތުގައި ކުއްޖާއަށް ޖެހުނީ ހާޓް އެޓޭކެއް ކަމަށް ބަލައި، ފުރަތަމަ ހިނަވަން ހުއްދަ ދީފައިވެއެވެ. ނަމަވެސް، ރަށުގެ ބައެއް ފަރާތްތަކުން މައްސަލަ ޖެއްސުމާ ގުޅިގެން ފުލުހުން މި މައްސަލަ ތަހުގީގުކުރަން ފަށާފައިވެއެވެ. އާއިލާގެ ފަރާތުން ވާހަކަދެއްކި މީހަކު ބުނާގޮތުގައި، ޒަކިއްޔާގެ މަރާ ގުޅިގެން ގިނަ ފަރާތްތަކުން ޝަކުވާ ކުރަމުންދާތީ، ފުލުހުން އޮޓޮޕްސީ ހެދުމަށް ނިންމި ކަމަށް އާއިލާއަށް އަންގާފައިވެއެވެ. މިކަމަށް އާއިލާވެސް އެއްބަސްވެފައިވެއެވެ.
