މާލޭގައި ހިންގި މާރާމާރީއަކާ ގުޅިގެން ހައްޔަރުކުރި މީހަކު ތަހުގީގު ނިމެންދެން ބަންދުކޮށްފިއެވެ.
މި މަހުގެ 9 ވަނަ ދުވަހު މ. އަލަމާގޯޅީގައި ތޫނު ހަތިޔާރު ބޭނުންކޮށްގެން މާރާމާރީ ހިންގި މައްސަލައެއްގައި ހައްޔަރުކުރީ އުމުރުން 21 އަހަރުގެ އަލީ ޒަޔާން ނަމަކަށް ކިޔާ މީހެކެވެ. ކޯޓު އަމުރެއްގެ ދަށުން އެމީހާ ހައްޔަރުކުރީ މިދިޔަ އާދިއްތަ ދުވަހުއެވެ.
އެ ޒުވާނާގެ ބަންދާ މެދުގައި ގޮތެއް ނިންމުމަށް ކްރިމިނަލް ކޯޓަށް ހާޒިރު ކުރުމުން ތަހުގީގު ނިމެންދެން ބަންދު ކުރުމަށް ކޯޓުން އަމުރުކޮށްފައިވެއެވެ.
މި މައްސަލަ ފުލުހުން ގެންދަނީ ތަހުގީގު ކުރަމުންނެވެ.
