ރ. ދުވާފަރު ކައުންސިލް މަރިޔަމް ޔަޝްފާ ފުލުހުންގެ އިދާރާއަށް ހާޒިރުވާން އަންގައިފިއެވެ.
ޔަޝްފާ ޕޮލިހަށް ހާޒިރު ކުރަނީ މިދިޔަ ނޮވެމްބަރު 11 ވަނަ ދުވަހު އެމްޑީޕީގެ ދަނޑިކޮށި ޖަގަހައިގައި ބޭއްވި ޖަލްސާގައި ކީ ބަންޖަކާ ގުޅިގެންނެވެ. އޭގައި އޭނާ ވަނީ ރައްޔިތުން ނުކުމެ، ހަވަރަށް ދޭން ޖެހޭ ކަމަށް ބުނެފައެވެ.
އެއީ ސީދާ ކާކަށް ނިސްބަތްކޮށް ބުނި އެއްޗެއް ކަން ޔަޝްފާ ވިދާޅުނުވިޔަސް، އޭނާ ވަނީ ރައީސް ޑރ. މުހައްމަދު މުއިއްޒަށް އަމާޒުކޮށް ވަރަށް ބޮޑަށް ފާޑު ވިދާޅުވެފައެވެ.
ޔަޝްފާ ފުލުހުންގެ އިދާރާ އަށް ހާޒިރުވާން އެންގީ މާދަމާ ހެނދުނު 10:30 އަށެވެ.
"ގާނޫނުއަސާސީގެ ދިފާއުގައި ރައްޔިތުން" ނަމުގައި އެމްޑީޕީން މި މަހު 10 ވަނަ ދުވަހުގެ ރޭ ކާނިވާ ސަރަހައްދުގައި ބޭއްވި ޖަލްސާގައި ވެސް ޔަޝްފާ ބަނދި ކިއާފައިވެއެވެ. އެ ޖަލްސާގައި އޭނާ ކީ "ތިއީ ބަހުލޫލްއެކޭ" މި ލަވައެވެ. އެ ލަވަ ސޯޝަލް މީޑިއާގައި ވަރަށް ބޮޑަށް ވައިރަލްވެގެން ދިޔައެވެ.
