ރާއްޖެ ބަނގުރޫޓުވާނެ ކަމަށް ބުނެ ބައިނަލްއަގުވާމީ މާލީ އިދާރާތަކުން ދެއްކި ވާހަކަ ހުއްޓިފައިވާ ކަމަށް ފިނޭންސް މިނިސްޓަރު މޫސާ ޒަމީރު މިއަދު ވިދާޅުވެއްޖެއެވެ.
ރައްޔިތުންގެ މަޖިލިހުގެ ޖަލްސާގައި ޒަމީރު ވިދާޅުވީ ރާއްޖެ ބަނގުރޫޓުވުމުން ސަލާމަތްވީ ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެން މިވީ އެއް އަހަރު ދުވަހުގެ ތެރޭގައި ކުރެއްވި ހަރުދަނާ މަސައްކަތްތަކުގެ ސަބަބުން ކަމަށެވެ. ޒަމީރު ވިދާޅުވި ގޮތުގައި ރައީސް ޑރ. މުއިއްޒު ވެރިކަމާ ހަވާލުވެވަޑައިގެންނެވި އިރު، 124 ބިލިއަން ރުފިޔާގެ ދަރަންޏެއް އޮތެވެ. އޭގެ ތެރެއިން ގާތްގަނޑަކަށް ދެބައިކުޅަ އެއްބަޔަކީ ކުރީގެ ސަރުކާރުން ނެގި ދަރަނި ކަމަށް އޭނާ ވިދާޅުވިއެވެ.
ދަރަނި އަދާކުރުމަށް ދައުލަތަށް ލިބޭ އާމްދަނީގެ 24 އިންސައްތައާ ގާތްކުރާ މިންވަރެއް ހަރަދުވާ ކަމަށް އޭނާ ވިދާޅުވިއެވެ.
ރައީސް ޑރ. މުއިއްޒު ވެރިކަމަށް ވަޑައިގެން އެ ހާލަތު ބަދަލުކޮށް، ރައްޔިތުންނަށް ހިދުމަތްތައް ފޯރުކޮށްދެވޭނެ ގޮތަށް ބަޖެޓް ފޯމިއުލޭޓްކޮށްފައިވާ ކަމަށް ޒަމީރު ވިދާޅުވިއެވެ.
ރައްޔިތުންނަށް ދޭން ޖެހޭ ހިދުމަތްތައް ފޯރުކޮށްދެމުން ދައުލަތުގެ ދަރަނި ދައްކާ ނަމަ، ރާއްޖެ ބަނގުރޫޓުވާނެ ކަމަށް އިންޓަނޭޝަނަލް މަނިޓަރީ ފަންޑު (އައިއެމްއެފް) ގެ ރިޕޯޓުތަކުގައި އޮތް ކަމަށް އޭނާ ވިދާޅުވިއެވެ. ނަމަވެސް ދައުލަތުގެ ހަރަދުތައް ކުޑަކޮށް ބޭރުގެ ދަރަނިތައް ދެއްކުން ފަސްކޮށްގެން ރާއްޖެ ބަނގުރޫޓުވުމުގެ ސިނާރިއޯއިން ނެރެެފައިވާ ކަމަށް އޭނާ ވިދާޅުވިއެވެ.
"އަޅުގަނޑުމެން ދައްކަން ޖެހޭ ބައެއް ދަރަނިތަކުގެ މުއްދަތު އިތުރުކޮށް ބައިލެޓްރަލީ މަސައްކަތްކޮށްގެން، ރަހްމަތްތެރި ގައުމުތަކާ އެކީގައި މަސައްކަތް ކުރައްވައިގެން އެ ހުރިހާ ކަމެއް މިހާރު ހުރީ ހަމަޖެހިފައި." ޒަމީރު ވިދާޅުވިއެވެ.
ޒަމީރު ވިދާޅުވި ގޮތުގައި ރާއްޖެ ބަނގުރޫޓު ނުވެ ސަލާމަތްވީ ރައީސް ޑރ. މުއިއްޒުގެ ހަރުދަނާ ސިޔާސަތުގެ ދަށުންނެވެ.
"އިއްޔެވެސް އައިއެމްއެފް އަދި ރޭޓިން އެޖެންސީތަކުން ވާހަކަދެއްކިއިރުވެސް ބުނެފައި އޮންނާނީ ހަރަދު ކުޑަކުރާށޭ، ހަރަދު ކުޑަކުރާށޭ. އެކަމަކު ރާއްޖޭގެ ބަނގުރޫޓުވުމުގެ ނުވަތަ އިންސޮލްވެންސީއަށް ދިއުމުގެ ވާހަކަ ދެއްކުން މިހާރު ހުއްޓިއްޖެ. އެއީ ރައީސްގެ ހަރުދަނާ ސިޔާސަތުގެ ދަށުންނޭ އަޅުގަނޑު ދަންނަވާނީ،" ޒަމީރު ވިދާޅުވިއެވެ.
