ހއ. ކެލާގައި ސިހުރު ހެދުމުގެ މައްސަލައަކާ ގުޅިގެން ފުލުހުންގެ ޓީމެއް އިއްޔެ އެ ރަށަށް ގޮސް، އެ ރަށުގެ ބައެއް ގޭގެ ފާސްކޮށް ސިހުރު ހަދަން ބޭނުންކުރާ ކަމަށް ބެލެވޭ އާލާތްތަކާއި މީހުން ފުލުހުންގެ ބެލުމުގެ ދަށަށް ގެނެސްފިވެއެވެ.
ފުލުހުން މައުލޫމާތު ދީފައިވާ ގޮތުގައި، ފުލުހުންނަށް ލިބިފައިވާ ޝަކުވާތަކަކާ ގުޅިގެން އެ ރަށުގެ ނުވަ ތަނެއް ބަލައި ފާސްކުރުމަށްފަހު ފަސް މީހަކު ފުލުހުންގެ ބެލުމުގެ ދަށަށް ގެންގޮސްފައިވެއެވެ. ނަމަވެސް، އެ ފަސް މީހުން މިހާރު ވަނީ ދޫކޮށްލާފައެވެ. އަދި ފުލުހުން ބުނެފައިވަނީ މި ޝަކުވާތަކާ ގުޅިގެން އިތުރަށް ބަލަންޖެހޭ ކަންކަން ބަލަމުންދާ ކަމަށެވެ.
ސިހުރުގެ ބަލިމަޑުކަމަކީ މުޅި ރާއްޖޭގައި އޮތް ވަރަށް ބޮޑު މައްސަލައެކެވެ. ރާއްޖޭގެ ވަރަށް މަދު ރަށެއްގައި ނޫނީ ސިހުރުގެ ބިރުވެރިކަން އެބައޮތެވެ. މީގެ ސަބަބުން އިޖުތިމާއީ ބޮޑެތި މައްސަލަތައް ކުރިމަތިވެފައިވާއިރު، ސިހުރު ހަދާ މީހުން ހުއްޓުވަން ކަމަށް ބުނެ ބައެއް ފަރާތްތަކުން ޖިނާއީ ބޮޑެތި ކުށްތަކަށް ވެސް އަރައިގަނެފައިވެއެވެ.
