ގދ. ތިނަދޫއަށް ސިޓީއެއްގެ ދަރަޖަ ދިން މައްސަލަ ފުލުހުންގެ މުއައްސަސާއަށާއި އެންޓި ކޮރަޕްޝަން ކޮމިޝަން (އޭސީސީ) އަށް ހުށަހަޅައިފިއެވެ.
އެ މައްސަލަ ފުލުހުންގެ މުއައްސަސާއަށާއި އޭސީސީ އަށް ހުށަހެޅުއްވީ އެންވަޔަރަމަންޓް މިނިސްޓްރީގެ ކުރީގެ ޑެޕިއުޓީ މިނިސްޓަރު އަދި ގާނޫނީ ވަކީލު މުހައްމަދު ރާޣިބެވެ.
ތިނަދޫއަށް ސިޓީއެއްގެ ދަރަޖަ ދިނީ ކުރީގެ ރައީސް އިބްރާހިމް މުހައްމަދު ސޯލިހްގެ ވެރިކަމުގައި މިދިޔަ އަހަރެވެ. މިދިޔަ ރިޔާސީ އިންތިހާބުގެ ކެމްޕެއިންގެ ތެރޭގައި ތިނަދޫއަށް ސިޓީގެ ދަރަޖަ ދިންއިރު، ތަފާސްހިސާބުތައް އޭރު ދައްކާ ގޮތުން ތިނަދޫގެ އާބާދީގައި ގާތްގަނޑަކަށް 8،000 އެެވެ. އެކަމަކު، އެ ރަށުގައި ދިރިއުޅެނީ 5،000 އެއްހާ ރައްޔިތުންނެވެ.
އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައިވާ ގޮތުން ސިޓީއެއްގެ ދަރަޖަ ދިނުމުގައި ބަލާ އެއް މިންގަނޑަކީ އާބާދީ 10،000 އަށް ވުރެ ދަށްނުވުމެވެ. މިވަގުތު ސިޓީއެއްގެ ދަރަޖަ ދީފައި އޮތީ ތިނަދޫ ސިޓީގެ އިތުރުން މާލެ ސިޓީ، އައްޑޫ ސިޓީ، ފުވައްމުލައް ސިޓީ އަދި ކުޅުދުއްފުށި ސިޓީއަށެވެ.
ރާޣިބު "ހަބަރު އޮންލައިން" އަށް ދެއްވި އިންޓަވިއުއެއްގައި ވިދާޅުވީ ގާނޫނާއި ގަވައިދުތަކާ ހިލާފަށް ތިނަދޫއަށް ސިޓީއެއްގެ ދަރަޖަ ދިން މައްސަލަ ރައްޔިތުންގެ މަޖިލިހުގެ ޖުޑިޝަރީ ކޮމިޓީ އާއި މިނިވަން މުއައްސަސާތަކުގެ ކޮމިޓީއަށާއި ރައީސުލްޖުމްހޫރިއްޔާގެ އޮފީހަށް ވެސް ހުށަހެޅުއްވުމަށް ތައްޔާރުވަމުންދާ ކަމަށެވެ.
އޭނާ ވިދާޅުވި ގޮތުގައި މިއީ ޖިނާއީ ވަރަށް ގިނަ ކުށްތަކެއް އެކުލެވިގެންވާ މައްސަލައެކެވެ. އެގޮތުން ވަޒީފާގެ މަސްއޫލިއްޔަތު ނަހަމަ ގޮތުގައި ހިފުމާއި އަމިއްލަ މަންފާއެއް ލިބޭ ގޮތަށް ކަންކުރުމާއި ސަރުކާރުގެ ލިޔުންތަކަށް ބަދަލު ގެނައުމާއި ސަރުކާރުގެ މުއައްސަސާއަކަށް ދޮގު މައުލޫމާތު ދިނުމާއި މީހުންގެ ޒާތީ މައުލޫމާތުތައް އޮޅުވާލައިގެން ބޭނުން ކުރުން ފަދަ ކުށްތައް ކޮށްފައިވާ ކަމަށް ރާޣިބު ވިދާޅުވިއެވެ.
މީގެތެރޭގައި ޖިނާއީ އިޖުރާއަތުގެ ގާނޫނުގެ ދަށުން އެއް ވަނަ ދަރަޖަ އާއި ހަތަރު ވަނަ ދަރަޖައިގެ ކުށްތައް ހުރުމުން މިއީ ޖަލު ހުކުމްތަކެއް އަންނަ ވަރުގެ ކުށްތަކެއް ކަމަށް ރާޣިބު ވިދާޅުވިއެވެ. އަދި މިކަމުގައި ބައިވެރިވާ މީހުންނަށް ހައްގު އަދަބު ދޭން ޖެހޭ ކަން އޭނާގެ ވާހަކައިގައި ފާހަގަ ކުރެއްވިއެވެ.
ތިނަދޫގެ އާބާދީގައި 10،000 ހަމަނުވާތީ އެ ރަށުގެ ސިޓީގެ ދަރަޖަ ބާތިލުކުރަން ހައި ކޯޓަށް މައްސަލަ ހުށަހެޅުއްވީ ވެސް ރާޣިބެވެ. އޭނާ ކުރިން ވިދާޅުވި ގޮތުގައި އާބާދީގައި 10،000 ހަމަވާ ކަމަށް ބުނެ ތިނަދޫ ކައުންސިލުން ގެންގުޅެފައިވަނީ އޮޅުވާލާފައިވާ ލިސްޓެކެވެ.
ލިސްޓު ދިރާސާ ކުރިއިރު، ބޮޑެތި މައްސަލަތަކެއް ފާހަގަ ކުރެވުނު ކަމަށް އޭނާ ވިދާޅުވިއެވެ.
އޭގެ ތެރޭގައި މީގެ އެތައް އަހަރެއް ކުރިން މަރުވެފައިވާ މީހުންނާއި އައިޑީކާޑް ނަންބަރު ބަދަލުކޮށްލާފައި އެއް ނަމެއްގައި ތިބި މީހުންނާއި ތަކުރާރުކޮށް އައިޑީކާޑް ބަދަލުކޮށްފައި މީހުން ނަންތައް ހިމަނާފައި ހުރި ކަމަށް ރާޣިބު ވިދާޅުވިއެވެ. ރާޣިބު ކޯޓަށް ހުށަހެޅުއްވި މައްސަލައިގައި އެދިވަޑައިގަތީ ތިނަދޫއަށް ދިން ސިޓީގެ ދަރަޖަ ބާތިލްކޮށްދިނުމަށެވެ. އެ މައްސަލައިގައި އޭނާ ދައުލަތާ ދެކޮޅަށް ވަކާލާތު ކުރައްވަން ނިންމެވުމުން އޭނާ ވަނީ ވަޒީފާ އިން ވަކިކޮށްފައެވެ.
