ރާއްޖޭގައި ހެލިކޮޕްޓަރުގެ ޚިދުމަތް ފެށުމަށް އަވަސް މުސްތަޤުބަލެއްގައި އެއްބަސްވުމުގައި ސޮއިކޮށް، އަންނަ އަހަރުގެ މާރިޗު މަހު އެ ޚިދުމަތް ފަށާނެ ކަމަށް ޓްރާންސްޕޯޓް މިނިސްޓަރު މުޙައްމަދު އަމީން ވިދާޅުވެއްޖެއެވެ.
ދައުލަތުގެ މީޑިއާގައި ވާހަކަފުޅު ދައްކަވަމުން މިނިސްޓަރު އަމީން ވިދާޅުވި ގޮތުގައި ހެލިކޮޕްޓަރު އޮޕަރޭޓްކުރުމަށް ހޮވުނު ފަރާތާއެކު ކުރިއަށް އޮތް 10 ނުވަތަ 15 ދުވަހުގެ ތެރޭގައި އެއްބަސްވުމުގައި ސޮއިކުރާނެއެވެ. މި ޚިދުމަތް ދިނުމަށް ނިންމާފައިވަނީ އިނގިރޭސިވިލާތުގެ ސިވިލް އޭވިއޭޝަންގެ އެހީގައި ހަދާ ޓެކްނިކަލް އެސެސްމަންޓްތަކަކަށް ފަހުގައި ކަމަށް އޭނާ ވިދާޅުވިއެވެ.
ސަރުކާރުން މި އަހަރުގެ ޖެނުއަރީ 28 ގައި އިޢުލާންކުރި ގޮތުގައި ހެލިކޮޕްޓަރުގެ ޚިދުމަތް ދޭން ނިންމާފައިވަނީ ބަލިމީހުން އުފުލުމަށާއި ސާރޗް އެންޑް ރެސްކިއުއަށް ޚާއްސަކޮށްގެންނެވެ. މީގެ އިތުރުން ފަތުރުވެރިކަމުގެ ސިނާޢަތުގައި ފަތުރުވެރިން އުފުލުމަށްވެސް މި ހެލިކޮޕްޓަރުތައް ބޭނުންކުރާނެއެވެ. ޓްރާންސްޕޯޓް މިނިސްޓްރީން ކުރިން ބުނެފައިވާ ގޮތުގައި މި ޚިދުމަތް ދިނުމަށް 36 ފަރާތަކުން ވަނީ ޝައުޤުވެރިކަން ފާޅުކޮށްފައެވެ.
މި ޚިދުމަތް ދިނުމަށް ސޮއިކުރާނީ 10 އަހަރު ދުވަހުގެ މުއްދަތަކަށެވެ. ރާއްޖޭގައި ހެލިކޮޕްޓަރުގެ ޚިދުމަތް ހުއްޓާލީ 1999 ވަނަ އަހަރު ހެލިކޮޕްޓަރު ވެއްޓުމުގެ ދެ ހާދިސާއެއް ހިނގައި، ދިވެހިންނާއި ފަތުރުވެރިން މަރުވުމާ ގުޅިގެންނެވެ.
