ހުޅުމާލެ ހޮސްޕިޓަލް ޓާޝަރީ ފެންވަރުގެ ހޮސްޕިޓަލަކަށް ބަދަލު ކުރުމަށް ފަހު އެ ތަން މިއަދު ހުޅުވައިފިއެވެ.
ހުޅުމާލެ ހޮސްޕިޓަލްގައި ބޭއްވި ރަސްމިއްޔާތެއްގައި ހެލްތު މިނިސްޓްރީގެ ކޮމިޝަނާ އޮފް ކޮލިޓީ އެޝުއަރެންސް ތަސްލީމާ އުސްމާން ވަނީ އެ ހޮސްޕިޓަލް ޓާޝަރީ ފެންވަރުގައި ހިންގުމުގެ ރަޖިސްޓްރޭޝަނާއި އޮޕަރޭޓިން ލައިސެންސް ދަރުމަވަންތަ ހޮސްޕިޓަލްގެ ސީއީއޯ އިބްރާހިމް އަބްދުއްރައްޒާގް ހަލީމްއާ ހަވާލު ކުރައްވައިފައެވެ. އަދި ރައީސް ޑރ. މުހައްމަދު މުއިއްޒު ވަނީ ޓާޝަރީ ފެންވަރަށް ތަރައްގީ ކުރި ހޮސްޕިޓަލް އިފްތިތާހުކޮށް ދެއްވައިފައެވެ.
މި ރަސްމިއްޔާތުގައި ހަލީމް ވިދާޅުވީ އެ މަގާމު އޭނާއާ ރައީސް މުއިއްޒު ހަވާލު ކުރެއްވީ މާލެ ސިޓީ ގްރޫޕުގެ ހޮސްޕިޓަލްތަކުގެ ހިދުމަތްތައް ކުރިއެރުމާއި އާ އީޖާދުތައް ގެނައުމަށާއި ފާއިތުވި ދުވަސްތަކުގައި އަލާނުލާއި އޮތް ދާއިރާތަކަށް އިންގިލާބީ ބަދަލެއް ގެނެސްދިނުމަށް އެދިވަޑައިގެން ކަމަށެވެ. އެކަން ހާސިލް ކުރައްވަން އޮޕަރޭޝަނަލް ބަޖެޓާއި ސިއްހީ ހިދުމަތްތެރިން ވެސް ހަމަޖައްސައި ދެއްވި ކަމަށް ހަލީމް ވިދާޅުވިއެވެ.
މީގެކުރިން ހުޅުމާލެ ހޮސްޕިޓަލަކީ ލެވެލް 2 ގެ ހޮސްޕިޓަލެއްގެ ގޮތުގައި ހިންގަމުން އައި ހޮސްޕިޓަލެކެވެ. އެހެންވެ ޓާޝަރީ ހޮސްޕިޓަލަކަށް އެ ތަނަށް ބަދަލުކޮށްފައި ވަނީ ކޮންމެހެން ވެސް ގެންނަން ޖެހޭ ބަދަލުތަކާއި މުހިންމު ހިދުމަތްތަކާ އެކުގައި ކަމަށް ހަލީމް ވިދާޅުވިއެވެ.
ހޮސްޕިޓަލްގައި އަލަށް ގާއިމުކުރީ 10 އެނދުގެ އައިސީޔޫއަކާއި އެންއައިސީޔޫއަކާއި ސެންޓްރަލް ސްޓްރެއިލް ސާވިސް ޑިޕާޓްމަންޓަކާއި ހަތަރު އޮޕަރޭޝަން ތިއޭޓަރެވެ.
ހަލީމް ވިދާޅުވީ ކުރިއަށް އޮތް ތަނުގައި އެތަނަށް ދިމާވެފައިވާ ޖާގައިގެ ދަތިކަން ހައްލުކުރުމަށް މަސައްކަތްތަކެއް ކުރަމުން އަންނަ ކަމަށެވެ. އެގޮތުން އީއާރުގެ ބެޑު ކެޕޭސިޓީ 14 އަށް އިތުރު ކުރުމުގެ މަސައްކަތް ފަށާފައިވާ ކަމަށް ހަލީމް ވިދާޅުވިއެވެ. އަދި ޑައިލަސިސް ހަދާ އެނދުގެ އަދަދު 30 އަށް އިތުރު ކުރާނެ ކަމަށް ވިދާޅުވިއެވެ. ހޮސްޕިޓަލްގެ ބެޑް ކެޕޭސިޓީ އަށް ދަތިތައް ހުރުމުން އިތުރު 28 އެނދު ބަހައްޓާނެ ކަމަށް ވެސް ހަލީމް ވިދާޅުވިއެވެ.
