މި އަހަރުގެ މިހާތަނަށް ދައުލަތަށް ލިބުނު އާމްދަނީ، ނިމިދިޔަ އަހަރުގެ އެއް މުއްދަތާ އަޅާބަލާއިރު 452 މިލިއަން ރުފިޔާއިން އިތުރުވެފައިވާކަމަށް ފިނޭންސް މިނިސްޓްރީގެ އައު ތަފާސްހިސާބުތަކުން ދައްކައިފިއެވެ.
ފިނޭންސް މިނިސްޓްރީން އެންމެ ފަހުން ނެރުނު ވީކްލީ ފިސްކަލް ޑިވެލޮޕްމަންޓް ރިޕޯޓުގައި ފާހަގަކޮށްފައިވާ ގޮތުގައި، މި ކުރިއެރުން ހާސިލުވެފައިވަނީ މައިގަނޑު ގޮތެއްގައި ފަތުރުވެރިކަމުގެ ދާއިރާއިން ލިބުނު އާމްދަނީގެ ސަބަބުންނެވެ. އޮކްޓޯބަރު މަހުގެ ނިޔަލަށް، ފަތުރުވެރިކަމުގެ ޓެކްސް ހިމެނޭގޮތަށް، ޖުމްލަ ޓެކްސް ރެވެނިއުގެ ގޮތުގައި 22.3 ބިލިއަން ރުފިޔާ ލިބިފައިވާއިރު، މިއީ މިދިޔަ އަހަރުގެ އެއް މުއްދަތާ އަޅާބަލާއިރު 1.8 ބިލިއަން ރުފިޔާގެ އިތުރުވުމެކެވެ.
ދައުލަތުގެ ޖުމްލަ އާމްދަނީ 29.1 ބިލިއަން ރުފިޔާއަށް އަރާފައިވެއެވެ. މި އަދަދަކީ 2023 ވަނަ އަހަރުގެ މި މުއްދަތުގައި ލިބުނު 28.7 ބިލިއަން ރުފިޔާއަށްވުރެ އިތުރު އަދަދެކެވެ.
މިނިސްޓްރީގެ ރިޕޯޓުގައި ފާހަގަކޮށްފައިވާ ގޮތުގައި ފާއިތުވި ހަފުތާގައި އެންމެ ގިނަ އާމްދަނީ ލިބިފައިވަނީ ޓޫރިޒަމް ގުޑްސް އަދި ސަރވިސް ޓެކުހުންނެވެ. އަދި ބަޖެޓުގެ ޖުމްލަ މާލީ ޑެފިސިޓް މިހާރު ހުރީ 9.9 ބިލިއަން ރުފިޔާގައި ކަމަށްވާއިރު، މިއީ މިދިޔަ އަހަރުގެ މި މުއްދަތުގައި ހުރި 10.2 ބިލިއަން ރުފިޔާއަށްވުރެ ދަށް އަދަދެކެވެ.
އިގްތިސާދީ ހާލަތު އިތުރަށް ރަނގަޅުކުރުމަށް ސަރުކާރުން ވަނީ ފަތުރުވެރިކަމާ ގުޅުންހުރި އެކި ޓެކުހުތަކާއި ފީތައް ބޮޑުކުރުމަށް ނިންމާފައެވެ. މިގޮތުން އަންނަ އަހަރުގެ ޖޫން މަހުން ފެށިގެން ޓީޖީއެސްޓީ 17 ޕަސެންޓަށް، ގްރީން ޓެކްސް 50 ޕަސެންޓަށް އިތުރުކުރުމަށާއި، އެއާޕޯޓު ޑިވެލޮޕްމަންޓް ފީ އަދި ޑިޕާޗަރ ޓެކްސްވެސް ބޮޑުކުރުމަށް ވަނީ ނިންމާފައެވެ.
މި ބަދަލުތަކުގެ ސަބަބުން ދައުލަތަށް ލިބޭ އާމްދަނީ ބޮޑުތަނުން އިތުރުވެ، ފިސްކަލް އަދި ދަރަނީގެ ދެމެހެއްޓެނިވިކަން އިއާދަވެ، ބޭރު ފައިސާގެ އާމްދަނީވެސް އިތުރުވާނެ ކަމަށް ސަރުކާރުން ލަފާކުރެއެވެ.
