ރާއްޖެ އާއި ތުރުކީ އާ ދެމެދު ގާއިމުކުރި މިނިވަން ވިޔަފާރީގެ އެއްބަސްވުމުގެ ދަށުން 100 އަށް ވުރެ ގިނަ ބާވަތްތަކުން ޑިއުޓީ ކުޑަވާނެ ކަމަށް އިކޮނޮމިކް މިނިސްޓަރު މުހައްމަދު ސައީދު މިއަދު ވިދާޅުވެއްޖެއެވެ.
ސައީދު "އެކްސް" ގައި ކުރެއްވި ޕޯސްޓެއްގައި ވިދާޅުވީ ރާއްޖެ އާއި ތުރުކީއާ ދެމެދު ގާއިމުކުރި ތާރީހީ އެއްބަސްވުމުގެ ދަށުން 100 އަށް ވުރެ ގިނަ ބާވަތްތަކުން ޑިއުޓީ ކުޑަވެގެން ދާނެ ކަމަށެވެ. ރާއްޖެ އިން ބޭރުކުރާ މަހުގެ ގިނަ ބާވަތްތައް ސުން ޕަސެންޓު ޑިޔުޓީގައި ތުރުކީ އަށް އެތެރެކުރެވޭނެ ކަމަށް އޭނާ ވިދާޅުވިއެވެ.
ރާއްޖެ އިން ވަނީ ޗައިނާއާ އެކުގައި ސޮއިކުރި މިނިވަން ވިޔަފާރީގެ އެއްބަސްވުމަށް އަމަލު ކުރަން މި ސަރުކާރުން ވަނީ ނިންމައިފައެވެ. އަންނަ އަހަރުގެ ފުރަތަމަ ކޮޅުގައި ވިޔަފާރީގެ އެއްބަސްވުމަށް އަމަލު ކުރެވޭނެ ކަމަށް ލަފާ ކުރެވޭ ކަމަށް ސައީދު ކުރިން ވަނީ ވިދާޅުވެފައެވެ.
ރާއްޖެ އިން ދަނީ އިންޑިއާ އާއި އިނގިރޭސި ވިލާތާއެކުގައި އެފަދަ އެއްބަސްވުމެއް ގާއިމުކުރުމުގެ މަސައްކަތް ކުރަމުންނެވެ.
އިކޮނޮމިކް މިނިސްޓްރީން ނެރުނު ބަޔާނެއްގައި ބުނީ، ރާއްޖެ އާއި ޗައިނާއާ ދެމެދު ގާއިމުކުރި އެއްބަސްވުމުގެ ދަށުން ތުރުކީއަށް އެކްސްޕޯޓު ކުރާ މަހުގެ ބާވަތްތަކަށް ލުއި ލިބުމާ އެކު ދިވެހި މަސް އެކްސްޕޯޓު ކުރާ ފަރާތްތަކަށް ތުރުކީ މާކެޓްގައި ވިޔަފާރި ފުޅާ ކުމުގެ ފުރުސަތު ފަހިވެގެންދާނެ ކަމަށެވެ.
މީގެއިތުރުން، މި އެއްބަސްވުމާ އެކު ދެ ގައުމުގެ ދެމެދު ކުރެވޭ ޔަފާރީގެ ހުރަސްތައް ކުޑަ ކުރެވި، ވިޔަފާރީގެ ގުޅުން ވަރުގަދަވެ، ދިވެހި ވިޔަފާރިތަކަށް ތުރުކީގެ އުފެއްދުންތައް އަގުހެޔޮކޮށް ލިބުމުގެ ފުރުސަތު ފަހިވެގެންދާނެ ކަމަށް އިކޮނޮމިކް މިނިސްޓްރީގެ ބަޔާނުގައިވެއެވެ.
ކުރިއަށް އޮތްތަނުގައި ވިޔަފާރި އަދި އިގްތިސާދީ ދާއިރާއިން މަސައްކަތްތައް އިތުރުކުރެވި، އާ ފުރުސަތުތައް ވިޔަފާރިތަކަށް ހުޅުވިގެންދާނެ ކަމަށް ވެސް އިކޮނޮމިކް މިނިސްޓްރީން ބުންޏެވެ.
