ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން "ހުސްވީމަ ހުސްވީ" ގެ ނަމުގައި ބޮޑު ވެއަރހައުސް ސޭލްއެއް މިއަދުން ފެށިގެން ނޮވެންބަރު 4، 2024 ގެ ނިޔަލަށް ފަށައިފިއެވެ. އެސްޓީއޯ ހެޑް އޮފީސް ގޯތިތެރޭގައި ކުރިއަށްދާ މި ސޭލްގައި ހިޓާޗީ، މަކިޓާ، ނިޕޯން ޕެއިންޓް، ރެމިންގްޓަން، ރަސްލް ހޮބްސް ފަދަ މަޝްހޫރު ބްރޭންޑްތަކާއި ބަދިގެ ތެރޭގައި ހިފާ ގެންގުޅޭ ތަފާތު ގިނަ ބާވަތްތަކުގެ ތަކެތި 80 ޕަސެންޓާ ހަމައަށް ޑިސްކައުންޓް އަގުތަކެއްގައި ވިއްކުމަށް ވަނީ ހަމަޖެހިފައެވެ.
ސޭލް ކުރިއަށްދާނީ ކޮންމެ ދުވަހެއްގެ ހަވީރު 4:00 އިން 6:00 އަށް އަދި ރޭގަނޑު 8:00 އިން 11:00 އަށް ކަމަށްވާއިރު، ހުކުރު ދުވަހު މެންދުރުފަހު 5:00 އިން 6:00 އަށާއި ރޭގަނޑު 8:00 އިން 11:00 އަށް ސޭލް ހުޅުވާލެވޭނެއެވެ.
އެސްޓީއޯއިން މަޢުލޫމާތު ދެއްވާފައިވާ ގޮތުގައި 500 ރުފިޔާއިން މަތިން ގަންނަ ކޮންމެ ފަރާތަކަށް ކޫޕަނެއް ދެވޭނެއެވެ. އަދި ސޭލް ކުރިއަށްދާ ކޮންމެ ރެއަކު ނަސީބުވެރި ފަރާތެއް ހޮވުމުގެ އިތުރުން، ސޭލް ނިމުމުން ބާއްވާ ގުރުއަތުލުމެއްގައި އެއް ފަރާތަކަށް ބޮޑު އިނާމެއް ދިނުމަށްވެސް ވަނީ ހަމަޖެހިފައެވެ.
ކޮންމެ އަހަރަކުވެސް މި ވެއަރހައުސް ސޭލް މާލޭގެ އިތުރުން އެސްޓީއޯގެ ފިހާރަތައް ހުރި އެހެން ރަށްރަށުގައިވެސް ކުރިއަށް ގެންދެއެވެ.
