މާލޭގައި ބިދޭސީއަކު އޮރިޔާންކޮށް، ކަރުގައި ވަޅި ޖައްސައިގެން ފައިސާ ފޭރިގަތް މައްސަލައިގައި ހައްޔަރުކުރެވުނު ސ. ހިތަދޫ/ ސޯމާ، ޝަފީގު އިބްރާހިމް (35 އަހަރު) އަކީ ކުރިން މއ. މަސްފަންގެއަށް މީހަކު ވައްދައިގެން ފޭރުނު މައްސަލައިގައި ހިމެނޭ މީހެއްކަން ވަނީ ހާމަވެފައެވެ. ކްރިމިނަލް ކޯޓުން މިއަދު އޭނާގެ ބަންދަށް 15 ދުވަސް ނަގާފައިވެއެވެ.
މިދިޔަ ޖުލައި 24 ވަނަ ދުވަހު މއ. މަސްފަންގޭގައި ހިނގި ހާދިސާގައި، ދިވެހި ފިރިހެނަކަށް ވަޅިން ބިރުދައްކައި، އަނިޔާކޮށް، ބަރަހަނާކޮށް ފޭރިގަތުމުގެ އިތުރުން، އޭނާގެ އެކައުންޓުން އެހެން އެކައުންޓަކަށް 20،000 ރުފިޔާ ފޮނުވައި، އަދި ކާޑު ބޭނުންކޮށްގެން އޭޓީއެމުން 25،000 ރުފިޔާ ނަގާފައިވާ ކަމަށް ފުލުހުން ވަނީ ބުނެފައެވެ.
ކޯޓު އަމުރުގައިވާ ގޮތުން، މއ. މަސްފަންގެއަކީ އެކި ބޭނުންތަކަށް މީހުން ވައްދައި، ބިރުދެއްކުމުގެ ތަކުރާރު ރެކޯޑެއް އޮތް ތަނެކެވެ. އެ މައްސަލައިގައި ޝަފީގާއެކު އިތުރު ދެ މީހެއްގެ މައްޗަށް ދަޢުވާކުރުމަށް ޕްރޮސިކިއުޓަރ ޖެނެރަލްގެ އޮފީހަށް ފޮނުވާފައިވެއެވެ. މި މައްސަލައިގައި އާއިޝަތު (43 އަހަރު) އާއި މުޙައްމަދު ރީހާން (27 އަހަރު) އަދި ޝަފީގު އިބްރާހިމް ވަނީ ޝަރީޢަތް ނިމެންދެން ބަންދުގައި ބެހެއްޓުމަށް ނިންމާފައެވެ. އެހެންނަމަވެސް، ޕީޖީ އޮފީހުގައި މައްސަލަ އޮއްވާ، ޝަފީގު ބަންދުން ދޫވެފައިވާއިރު، ދޫވި ސަބަބު އަދި ސާފުވެފައެއް ނުވެއެވެ.
މިފަހަރުގެ މައްސަލައިގައި ކްރިމިނަލް ކޯޓުގެ އަމުރުގައިވާ ގޮތުން، މއ. ރަޝްމާވިލާއަށް ބިދޭސީއަކު ގަދަކަމުން ވައްދައި، އަތާއި ފައި ބަނދެ، ބަރަހަނާކޮށް، ކަރުގައި ވަޅިޖަހައި، އޭނާގެ ވޮލެޓުން 10،600 ރުފިޔާ ފޭރިގަނެފައިވެއެވެ. މި މައްސަލައާ ގުޅިގެން ފުލުހުންގެ އިތުރު މަޢުލޫމާތެއް އަދި ލިބިފައެއް ނުވެއެވެ.
