އއ.ތޮއްޑޫގައި 'އިހުރު ބާޒާރު' ގެ ނަމުގައި ދަނޑުވެރިންގެ އުފެއްދުންތަކަށް ޚާއްޞަކޮށްގެން އައު މާރުކޭޓެއް ބީސީސީން ތަޢާރަފުކޮށްފިއެވެ.
ޖަޕާން ސަރުކާރާއި ޔޫ.އެން.ޑީ.ޕީގެ އެހީތެރިކަމާއެކު ކުރިއަށްގެންދެވޭ މި މަޝްރޫޢުގެ ރަސްމީކޮށް ހުޅުއްވާ ދެއްވީ ޖަޕާނުގެ ސަފީރު ޓަކެއުޗި މިޑޯރީ އެވެ. މި ރަސްމިއްޔާތުގައި ޔޫ.އެން.ޑީ.ޕީގެ ރެސިޑެންޓް ރެޕްރެސެންޓިވް އާއި، ބީސީސީގެ އިސްވެރިންނާއި، ތޮއްޑޫ ކައުންސިލް މެންބަރުންގެ އިތުރުން ރަށުގެ ގިނަ ރައްޔިތުން ބައިވެރިވިއެވެ.
މި މާރުކޭޓުގައި ތޮއްޑޫގެ ދަނޑުވެރިންނަށް 10 ކުށި (ކިއޮސް) ދޫކުރެވިފައިވެއެވެ. މި ކުށިތަކުގައި މޭވާއާއި ތަރުކާރީގެ އިތުރުން އަގުއެއްކުރި ބާވަތްތައް ވިއްކުމަށް ހަމަޖެހިފައިވެއެވެ. މިކަމާ ގުޅިގެން ކުށިތައް ކުއްޔަށްހިފާ ފަރާތްތަކަށް، ތަޖުރިބާކާރެއްގެ އިރުޝާދުގެ ދަށުން އަގުއެއްކުރި ތަކެތި އުފެއްދުމުގެ މަޢުލޫމާތު ދިނުމުގެ ސެޝަނެއް ކުރިއަށް ގެންދެވުނެވެ.
އަދި މި މުނާސަބަތު ފާހަގަކުރުމުގެ ގޮތުން އެރޭ ދިވެހި ޘަޤާފީ ކުޅިވަރުތަކެއް ހިމެނޭ ޚާއްޞަ ހަފްލާއެއްވެސް ބޭއްވުނެވެ.
