ދައުލަތުގެ ހިސާބު ބެލެހެއްޓުމުގައި ކުރީ ސަރުކާރުން ކޮށްފައިވާކަމަށް ބުނާ ގޯސްތައް އަވަހަށް ބެލުމަށް ކުރީގެ ދިފާއީ ވަޒީރު މާރިޔާ އަޙްމަދު ދީދީ ގޮވާލައްިވައިފިއެވެ.

މިއީ ބަންޑާރަނައިބު އަޙްމަދު އުޝާމް، ދައުލަތުގެ ބަޖެޓުން ޚަރަދުކުރުމަށްފަހު ފިނޭންސް މިނިސްޓްރީގެ ސިސްޓަމަށް ނުވައްދާ ރެކޯޑް ނުކޮށް ދެ ބިލިއަނަށް ވުރެ ގިނަ ރުފިޔާ އެބަހުރި ކަމަށް ވިދާޅުވުމާ ގުޅިގެން މާރިޔާ ދެއްވި ރައްދެކެވެ.

މާރިޔާ ވިދާޅުވެފައިވަނީ މިސަރުކާރުން ބަލަންޖެހޭކަމަށް ދެކޭ މައްސަލަތައް ލަސްނުކޮށް އަވަހަށް ބެލުމަށް ގޮވާލައްވާފައެވެ. ނަމަވެސް މިކަން ކުރުމަކީ ޤާނޫނުގައިވާ ގޮތުގެމަތީން މާލީ ހިސާބު ހާމަ ކުރަން ދައްކާ ބަހަނާއަކަށް ވެގެންނުވާނެ ކަމަށްވެސް އޭނާ ވިދާޅުވެފައިވެއެވެ.

ރައީސް އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމެއްގައި ބަންޑާރަނައިބު އުޝާމް ވިދާޅުވެފައިވަނީ، މިދިޔަ އަހަރުގެ މާލީ މުޢާމަލާތްތަކުގެ ތެރެއިން މާލީ ވުޒާރާގެ ހިސާބުތަކުގެ ތެރެއަށް ނުވައްދާ 2 ބިލިޔަނެއްހައި ރުފިޔާ ހުރިކަން ފާހަގަކުރެވިފައިވާ ކަމަށެވެ.

އަދި މި ފައިސާ މިއަހަރުގެ ހިސާބުތަކަށް ވެއްދުމަކީ ޤާނޫނީގޮތުން މައްސަލަތަކެއް ކުރިމަތިވާނެކަމެއް ކަމަށް އުޝާމް ފާހަގަކުރެއްވިއެވެ. މި މައްސަލަތައް ބެލުމަށް ނިންމާފައިވާ ކަމަށާއި، ދައުލަތުގެ ހިސާބުތައް ބެލެހެއްޓުމުގައި ހަދާފައިވާ "ގޯސްތައް" ނުބަލައި ދޫކޮށްނުލެވޭނެ ކަމަށްވެސް އުޝާމް ވަނީ ވިދާޅުވެފައެވެ.