ޕީޕީއެމްގެ ނައިބު ރައީސްކަމުގެ މަޤާމަށް މިއަދު ފޮރިން މިނިސްޓަރު އަބްދުﷲ ހަލީލް އައްޔަން ކޮށްފިއެވެ.
ޚަލީލު ޕީޕީއެމްގެ ނައިބު ރައީސްކަމަށް އައްޔަން ކޮށްފައިވަނީ ދިގު މުއްދަތަކަށްފަހު ބޭއްވުނު ޕީޕީއެމްގެ ސެނެޓް ބައްދަލުވުމެއްގައެވެ. މި ބައްދަލުވުމުގައި ބައިވެރިވި މެންބަރުންގެ އިއްތިފާޤުން ހަލީލްގެ އިތުރުން، ޕާޓީގެ ސެކްރެޓަރީ ޖެނެރަލްގެ މަޤާމަށް އައިޖީއެމްއެޗްގެ ސީއީއޯ އިބްރާހިމް އަބްދުލް ރައްޒާގު ހަލީމް ވެސް ވަނީ ހޮވާފައެވެ.
މި ބައްދަލުވުން ބޭއްވުނީ ޕީޕީއެމް އުވާލަން އުޅޭކަމުގެ ޚަބަރުތަކެއް ސޯޝަލް މީޑިއާގައި ފެތުރެމުންދަނިކޮށެވެ. ނަމަވެސް ޕާޓީގެ އޮފިޝަލަކު ވިދާޅުވެފައިވަނީ މިފަދަ އެއްވެސް މަޝްވަރާއެއް ނުކުރާކަމަށެވެ. މިހާރު ޕީޕީއެމްގެ ނައިބު ރައީސްކަމުގެ މަޤާމުގައި ތިއްބެވި ބޭފުޅުންގެ ތެރޭގައި ފިޝަރީޒް މިނިސްޓަރު އަހުމަދު ޝިޔާމާއި ޑިފެންސް މިނިސްޓަރު މުހައްމަދު ޣައްސާން މައުމޫން ހިމެނިވަޑައިގަންނަވައެވެ.
ޕީޕީއެމްގެ ލީޑަރޝިޕްގައި ކުރިން ތިއްބެވި ގިނަ ބޭފުޅުންތަކެއް ވަނީ ވެރިކަން ބަދަލުވުމާ ގުޅިގެން ޕީއެންސީއާ ގުޅިވަޑައިގެންފައެވެ. މިއީ ސަރުކާރު ހިންގާ ޕާޓީއާއެކު ޕީޕީއެމްއިން މަސައްކަތްކުރަމުންދާ ދަނޑިވަޅެއްގައި ޕީޕީއެމްގެ ލީޑަރޝިޕަށް ގެނައި ބަދަލެއްކަން ފާހަގަ ކޮށްލެވެއެވެ.
