އުރީދޫ މޯލްޑިވްސްއިން ވަނީ އެ ކުންފުނީގެ ލީޑަރޝިޕް ޑިވެލޮޕްމަންޓް ޕްރޮގްރާމް ޝަރަފުވެރި ހާވާޑް ޔުނިވަރސިޓީއާ ގުޅިގެން ކުރިއަށް ގެންދާކަން އިޢުލާންކޮށްފައެވެ.
2021 ވަނަ އަހަރު ފެށުނު މި ޕްރޮގްރާމަކީ މުވައްޒަފުން ބާރުވެރިކޮށް ކުރިއަރުވައި، ދުނިޔޭގެ ފެންވަރުގެ ތަމްރީނާއި ހުނަރު އަދި ތަޖުރިބާ ހޯދައިދިނުމަށް ކުރިއަށް ގެންދާ ޕްރޮގްރާމެކެވެ. މިއީ ރާއްޖޭގައި މިފަދަ ޔުނިވަރސިޓީއަކުން މުވައްޒަފުންނަށް ތަމްރީނު ފޯރުކޮށްދެވޭ ފުރަތަމަ ފަހަރެވެ.
އުރީދޫއިން މަޢުލޫމާތު ދީފައިވާ ގޮތުގައި، ކޮންމެ އަހަރަކު އުރީދޫގެ އުއްމީދީ ދެ ލީޑަރުން މި އިންޓެންސިވް ޕްރޮގްރާމުން ގްރެޖުއޭޓްވެ، ކުންފުނީގެ ތެރޭގައި އިނޮވޭޝަނާއި ކުރިއެރުމަށް އަގުހުރި އިލްމުތަކެއް ގެނެސްދެއެވެ. މި އިނީޝިއޭޓިވްގެ ސަބަބުން، ހުނަރުވެރިން ތަރުބިއްޔަތުކުރުމަށާއި، މުވައްޒަފުންގެ ކުރިއެރުމަށް އިންވެސްޓްކުރުމަށް ދެމިތިބޭނެ ކަމުގެ ޔަގީންކަން ލިބިގެންދާ ކަމަށްވެސް އުރީދޫއިން ބުނެފައިވެއެވެ.
އުރީދޫ މޯލްޑިވްސްގެ ޗެއާޕާސަން އަދި ގްރޫޕް އެޗްއާރު އެންޑް ސަސްޓެއިނަބިލިޓީ އޮފިސަރ ފާތިމާ އަލް ކުވާރީ ވިދާޅުވެފައިވަނީ، މި ޕްރޮގްރާމުގައި ކިޔަވަމުންދާ ދަރިވަރުންނާމެދު ފަޚުރުވެރިވާ ކަމަށާއި، އެ ބޭފުޅުންގެ ވިސްނުމަކީ ކުންފުނީގެ މުސްތަޤްބަލް ރަމްޒުކޮށްދޭ ކަމެއް ކަމަށެވެ. އަދި ކުރިއަށް އޮތް އަހަރުތަކުގައި މި ޕްރޮގްރާމުގައި ކިޔެވި ސްޓާފުންގެ ފަރާތުން އިނޮވޭޝަނާއި އެކްސެލެންސްއަށް މަގުފަހިވެގެންދާނެ ކަމަށް އުއްމީދުކުރައްވާ ކަމަށްވެސް ވިދާޅުވެފައިވެއެވެ.
އުރީދޫ މޯލްޑިވްސްގެ ޗީފް އެގްޒެކެޓިވް އޮފިސަރ ޚާލިދު އަލްހަމާދީ ވިދާޅުވެފައިވަނީ މި ޕްރޮގްރާމަކީ ލީޑާޝިޕާއި އުފެއްދުންތެރިކަމުގެ ސަގާފަތެއް ކުރިއެރުވުމަށް ކުރާ މަސައްކަތުގެ މުހިންމު ތަނބެއް ކަމަށެވެ. އަދި ދަސްވެނިންގެ ކުރިއެރުމުން ރަމްޒުކޮށްދެނީ ރާއްޖޭގައި ޓެލެކޮމިއުނިކޭޝަން އަދި ޚިދުމަތް ފޯރުކޮށްދިނުމުގައި އާ މިންގަނޑުތަކެއް ކަނޑައެޅުމަށް އުރީދޫއިން ކުރާ މަސައްކަތްކަމަށް ވިދާޅުވެފައިވެއެވެ.
އުރީދޫގެ ޑިރެކްޓަރ އެޗްއާރް ފަޒްނާ މަންސޫރު ވިދާޅުވެފައިވަނީ އުރީދޫ ތަރައްޤީ ކުރަނީ މުވައްޒަފުން ކުރިއަރުވައިގެން ކަމަށާއި، މި ޝަރަފުވެރި ޕްރޮގްރާމަކީ އަމިއްލަ އަދި ޕްރޮފެޝަނަލް ކުރިއެރުމަށް ހިތްވަރު ލިބޭ ޓްރާންސްފޯމޭޓިވް ތަޖުރިބާއެއް ކަމަށެވެ. ރާއްޖޭގައި ޓެލެކޮމިއުނިކޭޝަން އަދި ޑިޖިޓަލް ޚިދުމަތްތައް ފޯރުކޮށްދޭ އެންމެ އިސް ކުންފުނި ކަމަށްވާ އުރީދޫ މޯލްޑިވްސްއަކީ އަންނަން އޮތް ޖީލުގެ ލީޑަރުން ތަރުބިއްޔަތު ކުރުމަށް އަބަދުވެސް މަސައްކަތްކުރާ ކުންފުންޏެކެވެ.
