މއ. މަސްފަން ގޭގައި ހިނގި ނުރައްކާތެރި ހާދިސާއަކާ ގުޅިގެން ކްރިމިނަލް ކޯޓުގައި ތިން މީހެއްގެ މައްޗަށް ދައުވާ އުފުލައިފިއެވެ.
މި މައްސަލައިގައި ތުހުމަތު ކުރެވެނީ މިދިޔަ ޖުލައި 24 ވަނަ ދުވަހު ތިން މީހަކު ވެގެން ދިވެހި ފިރިހެނަކު ގަދަކަމުން ގެއަށް ވައްދައި، ވަޅިން ބިރުދައްކައި، އޮރިޔާންކޮށް އަނިޔާކުރި ކަމަށެވެ. އަދި އޭނާގެ މޯބައިލް ފޯނު އަތުލައި، ބޭންކު އެކައުންޓުން ފައިސާ ޓްރާންސްފަރކޮށް، ކޭޝް ކާޑު ބޭނުންކޮށްގެން އޭޓީއެމްއިން ފައިސާ ނެގިކަމަށްވެސް ތުހުމަތު ކުރެވެއެވެ.
މި މައްސަލައިގައި ދައުވާ އުފުލާފައިވަނީ ސ. ހިތަދޫ ސޯމާ، ޝަފީގު އިބްރާހީމް އާއި މއ. މަސްފެން މުހައްމަދު ރީހާން އަދި އައިޝަތުގެ މައްޗަށެވެ. މި ތިން މީހުންނާ ގުޅޭ މަޢުލޫމާތު ފުލުހުން ވަނީ ކުރިން އާންމުކޮށްފައެވެ. އަދި މިއީ މިފަދަ ކުށުގެ ރެކޯޑު އޮންނަ ބައެއްކަމަށްވެސް ފުލުހުން ވަނީ ފާހަގަކޮށްފައެވެ.
މި ތިން މީހުންގެ މައްޗަށް އުފުލާފައިވަނީ އަނިޔާއެއް ދިނުމުގެ ކުށުގެ ދައުވާ، އެނގިހުރެ ހުއްދަ ނޫން ގޮތެއްގައި މަޢުލޫމާތު ހޯދުމުގެ ކުށުގެ ދައުވާ އަދި ފޭރުމުގެ ކުށުގެ ދައުވާއެވެ. މި މައްސަލައިގެ ޝަރީޢަތް ކުރިއަށްދާނީ ކްރިމިނަލް ކޯޓުގައެވެ.
