ދިވެހިރާއްޖޭގެ ކޮންމެ ދަރިވަރަކަށްވެސް އޭލެވެލްއަށް ކިޔެވޭނެ މަގު ތަނަވަސްކުރުމަށް ސަރުކާރުން މަސައްކަތްކުރަމުންދާކަން ތަޢުލީމީ ވަޒީރު ޑރ. އިސްމާޢިލް ޝަފީޢު ހާމަކުރައްވާއިފިއެވެ.
އޭނާ ވިދާޅުވީ މުދައްރިސުންގެ ދުވަސް ފާހަގަކުރުމަށް ބޭއްވުނު ޖަލްސާގައި ވާހަކަ ދައްކަވަމުންނެވެ. ވަޒީރު ފާހަގަކުރެއްވި ގޮތުގައި، މިހާރު ކުރެވެމުންދާ މަސައްކަތްތަކުގެ ނަތީޖާއެއްގެ ގޮތުން، އޭލެވެލްއަށް ކިޔަވަން ފަށާ ދަރިވަރުންގެ ނިސްބަތް ވަނީ 77 އިންސައްތައަށް އިތުރުވެފައެވެ.
ސަރުކާރުން ވަނީ ރާއްޖޭގެ 23 ސްކޫލެއްގައި އޯލެވެލް ނިންމާ ހުރިހާ ދަރިވަރުންނަށްވެސް އޭލެވެލްއަށް ކިޔެވުމުގެ ފުރުޞަތު ހޯދައިދިނުމަށް ނިންމާފައެވެ. މިއީ ކުރިން އޮތް ގޮތާ ޚިލާފަށް، ވަކި އަދަދެއްގެ މާއްދާތަކަކުން ފާސްވާ ދަރިވަރުންނަށް އެކަނި ލިބުނު ފުރުޞަތެކެވެ. ވަޒީރު ވިދާޅުވިގޮތުގައި މިވަގުތު ދިމާވެފައިވާ އެންމެ ބޮޑު ގޮންޖެހުމަކީ މަތީ ސާނަވީ ތަޢުލީމު ދޭ ސްކޫލްތަކާއި ޖާގައިގެ ދަތިކަމެވެ.
ވަޒީރު އިތުރަށް ފާހަގަކުރެއްވި ގޮތުގައި، އޭލެވެލްއަކީ ފުރަތަމަ ޑިގްރީގެ ފެންވަރާ ވަރަށް ގާތްކުރާ ކޮންޓެންޓެއް ކަމަށާއި، މުދައްރިސްކަމަކީ ވަރަށް ފުޅާ ދާއިރާއެއް ކަމަށެވެ. އެމަނިކުފާނު ބާރުއަޅުއްވާފައިވަނީ އޭލެވެލް ކިޔަވާ ދަރިވަރުން މުދައްރިސްކަމަށް އައުމުގެ މުހިންމުކަމުގެ މައްޗަށެވެ. އަދި މުދައްރިސްކަމުގެ ތަޖުރިބާއާއެކު، ކުރިމަގުގައި އެހެނިހެން ދާއިރާތަކުންވެސް ކުރިއަށްދެވިދާނެކަން ފާހަގަކުރެއްވިއެވެ.
މުދައްރިސުންގެ ދުވަސް ފާހަގަކުރުމުގެ މަޤްޞަދަކީ ތަރުބިއްޔަތު ލިބިފައިވާ، ޢިލްމުވެރި ދަރިންތަކެއް އުފެއްދުމަށް މުދައްރިސުން ކުރައްވާ ޤައުމީ މަސައްކަތް ފާހަގަކުރުމެވެ.
