ޚާރިޖީ ވަޒީރު ޑރ. އަބްދުﷲ ޚަލީލް އިއްޔެ އެ މަޤާމާ ޙަވާލުވުމަށްފަހު، ބޭރުގެ ޑިޕްލޮމެޓަކާއެކު ބޭއްވެވި ފުރަތަމަ ބައްދަލުވުމުގައި އިންޑިއާގެ ސަފީރު މުނޫ މަހާވަރާއާ ބައްދަލުކުރައްވައިފިއެވެ.
ޚާރިޖީ ވުޒާރާގައި މިއަދު ބޭއްވުނު މި ބައްދަލުވުމުގައި ދެ ގައުމުގެ ގުޅުން އިތުރަށް ބަދަހިކުރުމާއި، ދެ ގައުމުގެ މަސްލަހަތު ހިމެނޭ ދާއިރާތަކުން ގުޅުން ވަރުގަދަކުރުމާ ބެހޭގޮތުން މަޝްވަރާ ކުރެއްވިއެވެ.
މިފެށޭ ހަފްތާގެ ތެރޭގައި ރައީސް ޑރ. މުއިއްޒު އިންޑިއާއަށް ރަސްމީ ދަތުރުފުޅެއް ކުރެއްވުމަށް ހަމަ�ެހިފައިވާކަމަށް މަޢުލޫމާތު ލިބިފައިވެއެވެ. އިންޑިއާގެ ހިންދުސްތާން ޓައިމްސްއިން ބުނެފައިވާ ގޮތުގައި ރައީސް މުއިއްޒު އިންޑިއާއަށް ވަޑައިގަންނަވާނީ މި މަހުގެ 7 އިން 9 އަށެވެ. އަދި މި މަހުގެ 8 ވަނަ ދުވަހު އިންޑިއާގެ ބޮޑުވަޒީރާއެކު މަޝްވަރާތައް ބޭއްވެވުމަށް ހަމަޖެހިފައިވާ ކަމަށްވެސް އެ ނޫހުގައި ބުނެފައިވެއެވެ.
މި ދަތުރުފުޅުގައި ދެ ޤައުމުގެ ދެމެދުގައި ޚާރިޖީ ދާއިރާއިން ގުޅުން އިތުރަށް ރަނގަޅު ކުރުމަށް މަޝްވަރާތައް ކުރިއަށްގެންދިއުމަށް ހަމަޖެހިފައިވާ ކަމަށް ހިންދުސްތާން ޓައިމްސްގައި ރިޕޯޓްކޮށްފައިވެއެވެ. އަދި މާލީ ދާއިރާއިން އެހީތެރިކަން ހޯދުމަށް ދިވެހި ސަރުކާރުގެ ހުށަހެޅުންތަކެއް އިންޑިއާ ސަރުކާރަށް ހުށަހަޅާނެކަމަށް ބެލެވޭކަމުގައިވެސް އެ ނޫހުގައި ބުނެފައިވެއެވެ.
މި ސަރުކާރުގެ ވެރިކަމުގެ ކުރީކޮޅު ހީނަރުވެފައި އޮތް ރާއްޖެއާއި އިންޑިއާގެ ގުޅުން މިހާރު ވަނީ ވަރަށް ބޮޑަށް ރަނގަޅުވެފައެވެ. މިގޮތުން ދިވެހި ސަރުކާރުން އިންޑިއާއަށް ދައްކަންޖެހޭ ލޯނު ޕޭމަންޓްތައް ދެއްކުމުގެ މުއްދަތުތައް ފަސްކޮށްދިނުމަށް އެ ގައުމުން މިހާރު ވަނީ ނިންމާފައެވެ.
