އައްޑޫ ސިޓީގައި ފެނުގެ ޚިދުމަތް މެދުކެނޑިއްޖެއެވެ. މިކަން ދިމާވެފައިވަނީ އެ ސިޓީގެ ފެން ޕްލާންޓް ހުއްޓުމާ ގުޅިގެންނެވެ. ފެނަކަ ކޯޕަރޭޝަނުން މަޢުލޫމާތު ދެއްވާފައިވާ ގޮތުގައި، އައްޑޫ ސިޓީގެ ގުޅިފައިވާ ރަށްތަކަށް ފެން އުފައްދާ އާރު.އޯ ޕްލާންޓުގެ ބޯރހޯލް ޕަންޕަށް މައްސަލައެއް ދިމާވުމާ ގުޅިގެން ޕްލާންޓް ވަނީ ހުއްޓިފައެވެ.
ފެނަކައިން އިތުރަށް ވިދާޅުވީ މި މައްސަލަ ޙައްލުކޮށް ޕްލާންޓް އަލުން ހިންގަން ފެށުމުގެ މަސައްކަތް ކުރަމުންދާ ކަމަށެވެ. ނަމަވެސް، މި މައްސަލަ ޙައްލުވަންދެން ފެން އުފެއްދުން ހުއްޓިފައިވާތީ، އައްޑޫ ސިޓީގެ ގުޅިފައިވާ ރަށްތަކަށް ފޯރުކޮށްދޭ ފެން ހުސްވެ، ޚިދުމަތް މެދުކެނޑުމަކީ އެކަށީގެންވާ ކަމެއްކަމަށް ފެނަކައިން ވަނީ އިންޒާރު ދެއްވާފައެވެ.
ފެނަކައިން އިތުރަށް ވިދާޅުވެފައިވަނީ މައްސަލަ ޙައްލުވީ ހާވެސް އަވަހަކަށް ކަސްޓަމަރުންނާ އެ މަޢުލޫމާތު ހިއްސާކުރާނެ ކަމަށެވެ. އަދި ފެނުގެ ޚިދުމަތް މެދުކެނޑިގެން ދިމާވެދާނެ ދަތިތަކަށްޓަކައި ނުހަނު މަޢާފަށް އެދޭ ކަމަށްވެސް ވިދާޅުވެފައިވެއެވެ. ފާހަގަކޮށްލެވޭ ކަމަކީ، ފެނަކައިން އައްޑޫ ސިޓީއަށް ދެމުންގެންދާ ކަރަންޓާއި ފެނުގެ ޚިދުމަތް ވަރަށް އަވްނާ އަވްނަށް މެދުކެނޑެމުންދާކަމެވެ. މިކަމާ ގުޅިގެން ރައްޔިތުންގެ ކަންބޮޑުވުން އިތުރުވަމުންދާކަން ފާހަގަކުރެވެއެވެ.
